VIDEO: ვაწაძის დუბლით - ქეცბაიამ სადებიუტო მატჩი წყალტუბოში მოიგო

თემურ ქეცბაიამ, დინამო თბილისის მთავარი მწვრთნელის პოსტზე, სადებიუტო მატჩი წყალტუბოში მოიგო - 2:1.

საქართველოს 19-გზის ჩემპიონმა ეროვნული ლიგის მე-9 ადგილოსან სამგურალს, მათე ვაწაძის დუბლით, აჯობა და 7-მატჩიანი მოუგებელი სერია შეწყვიტა. იმერელთაგან თავი რიანმა გამოიჩინა, რომელმაც ლაშა შერგელაშვილის პასით გაიტანა. ვაწაძემ მიმდინარე ჩემპიონატში პირველი გოლები მიითვალა.

დინამოელებმა წლევანდელ გათამაშებაში მე-2 გამარჯვება მოიპოვეს - 7 მარტს, ეროვნული ლიგის მე-2 ტურში, დებიუტანტ სპაერს ასევე 2:1 მოუგეს.

შედეგად, დედაქალაქელებმა 11 ქულა მოაგროვეს, მე-6 პოზიციაზე აინაცვლეს და მე-2 ადგილოსან დილას - 2-ით, ხოლო ლიდერ იბერიას 6 ქულით ჩამორჩებიან (ამ ტურში ჯერ არც ერთს უთამაშია).

რაც შეეხება გიორგი ონიანის სამგურალს, გუნდმა ზედიზედ მე-4 თამაში წააგო, 8 ქულა აქვს და ბოლოსწინა ადგილზეა - უსწრებს მხოლოდ 7-ქულიან დინამო ბათუმს, რომელიც ხვალ ტორპედო ქუთაისს მასპინძლობს.

2 მაისს, დინამო თბილისი სწორედ დინამო ბათუმს, აჭარაბეთ არენაზე, ესტუმრება, ხოლო სამგურალი ამავე დღეს გაგრას მიიღებს.