VIDEO: ზედიზედ მე-7 გამარჯვება - მოქმედმა ჩემპიონმა მუნდიალამდე ბოლო მატჩი გამართა

მსოფლიოს მოქმედმა ჩემპიონმა, არგენტინის ნაკრებმა, 2022 წლის მუნდიალის ფინალის შემდეგ, ევროპულ ნაკრებთან პირველად ითამაშა.

ალაბამას შტატ ობერნში გამართულ მატჩში, ლიონელ სკალონის გადახალისებული შემადგენლობით მყოფმა ალბისელესტემ ისლანდიის ეროვნულ გუნდს 3:0 მოუგო - ვალენტინ ბარკომ სწრაფი გოლი გაიტანა, რასაც ბოლო 15 წუთში ლეო მესისა და ტიაგო ალმადას გოლები მიემატა.

მესი მოედანზე 70-ე წუთზე შევიდა და 5 წუთში ლაუტარო მარტინესის მიერ მოპოვებული პენალტი შეაგდო - ეროვნულ გუნდში თავი 117-ედ გამოიჩინა. ალმადას გოლისას, 38 წლის ლეგენდამ პრე-ასისტი შეასრულა, საგოლე პასი კი როდრიგო დე პაულმა გააკეთა.

მსოფლიო ჩემპიონატის შესარჩევი ეტაპის ბოლო ტურში, ეკვადორში (0:1) მარცხის შემდეგ, არგენტინელებმა ზედიზედ მე-7 ამხანაგურ მატჩში გაიმარჯვეს - ვენესუელა, პუერტო რიკო, ანგოლა, მავრიტანია, ზამბია, ჰონდურასი და ისლანდია დაამარცხეს ისე, რომ გოლი მხოლოდ მავრიტანიისგან მიიღეს, 6-ჯერ კი კარი მშრალად შეინახეს.

ალბისელესტე აშშ-კანადა-მექსიკის მუნდიალის პირველ ტურში ალჟირს ხვდება (17 ივნისის 05:00 საათზე), რის შემდეგაც ავსტრიასთან (22 ივნისის 21:00 საათზე) და იორდანიასთან ითამაშებს (28 ივნისის 06:00 საათზე).