პორტუგალიის პრიმეირა ლიგის 30-ე ტურში, დიდი ლისაბონური დერბი შედგა - ბენფიკამ სპორტინგს სტუმრად 2:1 მოუგო.
ჟოზე მოურინიოს გუნდი 27-ე წუთზე პენალტით დაწინაურდა, თუმცა იქამდე ამავე სცენარით წინ გასვლა ლომებს შეეძლოთ - ლუის სუარესს პენალტი ანატოლი ტრუბინმა აუღო.
მეორე ნახევარში სპორტინგმა, ჰიდემასა მორიტას გოლით, გაათანაბრა და დამატებულ წუთებზე წინაც გადიოდა, თუმცა გოლი არ ჩაითვალა და რამდენიმე წამში აქეთ გაუშვეს - არწივებს 3 ქულა და ჩემპიონატის მე-2 პოზიცია გამოცდილმა რაფა სილვამ მოუტანა.
გიორგი ქოჩორაშვილმა მთელი შეხვედრა სათადარიგოთა სკამზე გაატარა - 5 თებერვლის შემდეგ წუთიც არ უთამაშია.
შედეგად, ბენფიკამ სპორტინგს მიმდინარე სეზონში პირველად გადაასწრო, თუმცა ლისაბონის მწვანე მხარის წარმომადგენლებს 1 თამაშით ნაკლები აქვთ ჩატარებული და ჩემპიონთა ლიგის ზონაში დაბრუნება შეუძლიათ - მე-3 ადგილოსანი ევროპა ლიგაზე გადის.
დერბიში ბენფიკას გამარჯვება მაგარი ამბავია პორტუსთვის, რომელმაც თავისი მატჩი მოიგო და ჩემპიონობას კიდევ უფრო მიუახლოვდა - ახლა სხვაობა 7 ქულაა, თუმცა თუკი სპორტინგი გამოტოვებულ თამაშს მოიგებს, 5 ქულა გახდება. წინ კიდევ 4 ტურია და დრაკონები ეშტრელასა და ავეშს სტუმრად ხვდებიან, ხოლო ალვერკასა და სანტა კლარას დრაგაუზე მიიღებენ.
