პიოტრ იანს არ აღიზიანებს ის მოსაზრება, თითქოს მერაბ დვალიშვილი მათი წინა შეხვედრისთვის სათანადოდ მომზადებული არ იყო.
„ეს საერთოდ არ მაღიზიანებს. თუ მას ან მის გულშემატკივრებს სურთ, ეს თავის გასამართლებლად გამოიყენონ, მალე ყველაფერს გავარკვევთ.
ბრძოლის თარიღი უკვე ცნობილია, ერთ კვირაზე ნაკლები დარჩა და მალე გავიგებთ, ვინ არის უკეთესი მებრძოლი“, - განაცხადა იანმა Uncrowned-თან საუბრისას.
ცოტა ხნის წინ დვალიშვილმა მეტოქეს სიტყვიერად შეუტია და „უზრდელი ადამიანი“ უწოდა, რომელსაც ჭკუის სწავლება სჭირდება.
საპასუხოდ იანმა აღნიშნა, რომ განმეორებით ბრძოლაზე საუბრისას მხოლოდ სიმართლეს ამბობდა და სინამდვილეში სწორედ დვალიშვილია ის, ვინც მარცხის შემდეგ საკუთარ თავზე გამოსცადა დამცირება.
„უზრდელად არ მოვქცეულვარ. უბრალოდ, სიმართლეს ვამბობდი. როდესაც შეკითხვა დამისვეს და მან რაღაცების გამოგონება დაიწყო, უბრალოდ ვუთხარი, რომ გაჩუმებულიყო. სულ ეს იყო. საერთოდ არ ვყოფილვარ უზრდელი.
ყველაზე მნიშვნელოვანი ისაა, რომ მან თავადაც იცის, როგორ დავამდაბლე“, - განაცხადა იანმა.
ხელის მოტეხილობა იანის დვალიშვილთან დაპირისპირების ერთ-ერთ მთავარ სასაუბრო თემად იქცა. ამასთან, რუსმა მებრძოლმა ორ ბრძოლას შორის საკუთარ ტაქტიკაში არაერთი ცვლილება შეიტანა.
„ამ ორ ბრძოლას შორის ყველაზე დიდი განსხვავება ის იყო, რომ მეორედ მას დარტყმებს ვაყენებდი.
თავადაც აღიარა ინტერვიუებში, რომ მე-2 რაუნდში ფსიქოლოგიურად გატყდა. ამიტომ თამამად შეიძლება ითქვას, რომ მას ჭკუა ვასწავლე.
ზოგადად, ერთმანეთის შესახებ ბევრი ინფორმაცია გვაქვს. უკვე ორჯერ ვიბრძოლეთ და ვიცით, რას უნდა ველოდოთ ერთმანეთისგან.
ზუსტად ვიცი, რას უნდა ველოდო მისგან ამჯერად და ისიც ვიცი, როგორ გავანეიტრალო მისი მოქმედებები.
მჯერა, რომ შევძლებ, ვაიძულო ისე იბრძოლოს, როგორც მე მსურს. გავაკონტროლო, სად წარიმართება ბრძოლა და კიდევ ერთხელ დავამარცხო“, - აღნიშნა იანმა.
პიოტრ იანისა და მერაბ დვალიშვილის მე-3 დაპირისპირება, რომელიც 24 ოქტომბერს აბუ დაბიში გაიმართება, ორივე მებრძოლისთვის 2026 წლის პირველი ბრძოლა იქნება.
