ზედიზედ მეოთხედ — მისი უდიდებულესობა ელ კლასიკო ესპანეთის სუპერთასის ფინალში

დღეს საღამოს, ჯისდაში, King Abdullah Sports City-ის სტადიონზე მორიგი ელ კლასიკო გაიმართება — ბარსელონა და რეალი ერთმანეთს 2026 წლის პირველი ტიტულის, ესპანეთის სუპერთასის, მოსაპოვებლად დაუპირისპირდებიან.

ბარსელონა — რეალი

ესპანეთის სუპერთასი, თბილისის დროით 23:00

ბარსელონა ფინალს ნახევარფინალში ატლეტიკის დამაჯერებელი განადგურების შემდეგ ხვდება (5:0). ჰანსი ფლიკის გუნდმა მატჩის ბედი პირველივე ტაიმში გადაწყვიტა — გოლები რაფინიამ, ფერმინ ლოპესმა, ფერან ტორესმა და რუნი ბარდჯიმ გაიტანეს. კატალონიელებს ფინალის წინ ერთით მეტი დღე ჰქონდათ აღდგენისთვის, რაც შესაძლოა გადამწყვეტი ფაქტორი გახდეს. ბარსელონა, რომელიც სუპერთასის 15-გზის მფლობელია, ყველა ტურნირზე ზედიზედ ცხრა მოგებული მატჩის სერიით მიდის და რეალთან ბოლო ხუთი დაპირისპირებიდან ოთხი მოიგო, მათ შორის შარშანდელი სუპერთასის ფინალიც (5:2).

რეალმა ფინალამდე გზა მძიმე მადრიდული დერბის გავლით გაიკვლია — ატლეტიკო 2:1 დაამარცხა. ჩაბი ალონსოს გუნდს გამარჯვება ფედერიკო ვალვერდესა და როდრიგოს გოლებმა მოუტანა, თუმცა შეხვედრის ბოლო წუთები დაძაბული გამოდგა გაშვებული ბურთის გამო. რეალს სუპერთასი 13-ჯერ აქვს მოგებული, ბოლო ტრიუმფი კი 2024 წელს იზეიმა, როდესაც ფინალში სწორედ ბარსელონა 4:1 გაანადგურა. ლა ლიგის ცხრილში მადრიდელები კატალონიელებს ოთხი ქულით ჩამორჩებიან, თუმცა ელ კლასიკოს სტატუსი ყოველთვის განსაკუთრებულია, სატურნირო მდგომარეობის მიუხედავად.

ორივე გუნდში საკადრო პრობლემები კვლავ აქტუალურია. ბარსელონაში აღდგენას განაგრძობენ გავი და კრისტენსენ, თუმცა მოსალოდნელია ლამინ იამალის დაბრუნება სასტარტო შემადგენლობაში — ნახევარფინალში მან თამაში სათადარიგოთა სკამიდან დაიწყო. საერთო ჯგუფთან ერთად უკვე ვარჯიშობს რონალდ არაუხოც. რეალმა სერიოზული გაძლიერება მიიღო — გუნდს მუხლის ტრავმის შემდეგ კილიან მბაპე დაუბრუნდა. ამასთან, კითხვის ნიშნის ქვეშ რჩება რუდიგერისა და როდრიგოს მონაწილეობა, რომლებმაც ატლეტიკოსთან მატჩში დაზიანებები მიიღეს, ხოლო ალექსანდერ-არნოლდი და მილიტაო ფინალს დანამდვილებით გამოტოვებენ.

სავარაუდო შემადგენლობები

ბარსელონა: ჟოან გარსია — კუნდე, კუბარსი, ერიკ გარსია, ბალდე — პედრი, დე იონგი — იამალი, ფერმინი, რაფინია — ტორესი.

რეალი: კურტუა — ვალვერდე, ასენსიო, ჰაუსენი, კარერასი — კამავინგა, ჩუამენი, ბელინგემი — როდრიგო, მბაპე, ვინისიუს ჯუნიორი.

ვერ ითამაშებენ: გავი, ტერ შტეგენი, კრისტენსენი (ბარსელონა) — ალექსანდერ-არნოლდი, მილიტაო, ბრაჰიმ დიასი (რეალი).

კითხვის ნიშნის ქვეშ: არაუხო (ბარსელონა) — მბაპე, როდრიგო, რუდიგერი, ასენსიო (რეალი).

ურთიერთშეხვედრების ისტორია

ბარსელონამ გასულ სეზონში რეალთან ოთხივე მატჩი მოიგო, მათ შორის სუპერთასის ფინალიც — 5:2, თუმცა მიმდინარე სეზონში ერთადერთ შეხვედრაში, ოქტომბერში, მადრიდელებმა იმარჯვეს — 2:1. სუპერთასის ფარგლებში გამართული 18 დაპირისპირებიდან რეალს 10 გამარჯვება აქვს (2 ფრე, 6 მარცხი). ამ ორ გუნდს შორის ბოლო სამი სუპერთასის ფინალში ჯამში 16 გოლი გავიდა.

ბარსელონა და რეალი სუპერთასის ფინალში ერთანეთს ზედიზედ მეოთხედ დაუპირისპირდებიან — წინა 3 შემთხვევაში ორჯერ გამარჯვება ბარსელონას (2023, 2025) დარჩა, ერთხელ კი (2024) რეალს).

სტატისტიკა და სერიები

ჰანსი ფლიკის ხელმძღვანელობით ბარსელონას მიერ სუპერთასზე გატანილი 12 გოლიდან 9 პირველი ტაიმის განმავლობაში გავიდა

ბარსელონას 2011 წლის შემდეგ სუპერთასი ზედიზედ არ მოუგია

რეალის ბოლო ექვსი მატჩიდან ხუთში ორივე გუნდმა შეძლო გოლის გატანა

მადრიდელებმა ბოლო ხუთი შეხვედრიდან ოთხში ზუსტად ერთი ყვითელი ბარათი მიიღეს.