ფრანგული ფეხბურთის ლეგენდა ზინედინ ზიდანი საფრანგეთის ნაკრების მთავარი მწვრთნელის პოსტზე ოფიციალურად წარადგინეს.
მან ეს თანამდებობა დიდიე დეშამისგან ჩაიბარა, რომელმაც მსოფლიო ჩემპიონატის დასრულების შემდეგ გუნდიდან წასვლის შესახებ ოფიციალურად განაცხადა. ფრანგული ფეხბურთის ფედერაციის პრეზიდენტმა, ფილიპ დიალომ აღნიშნა, რომ ზიდანთან მოლაპარაკებები ჯერ კიდევ 2025 წლის თებერვალში დაიწყო.
მწვრთნელობიდან ხუთწლიანი პაუზის შემდეგ, ზიდანმა პარიზში გამართულ პრესკონფერენციაზე აღიარა, რომ ამ პერიოდში მრავალი შეთავაზება მიიღო:
ყველა შეთავაზებაზე უარი ვთქვი საფრანგეთის ეროვნული ნაკრების გამო, რადგან რეალში მუშაობის შემდეგ ეს იყო ერთადერთი რამ, რაც მინდოდა. ერთადერთი, რაც მოტივაციას მაძლევს, არის ამ გუნდისთვის მუშაობა და იმის უზრუნველყოფა, რომ მან გამარჯვებები განაგრძოს.
ზიდანმა ასევე დასძინა, რომ ეს დღე მისი სამწვრთნელო კარიერის საუკეთესო მომენტია.
ახალმა მთავარმა მწვრთნელმა ფრანგულ ფედერაციასთან ოთხწლიანი კონტრაქტი გააფორმა. მან პრესკონფერენციის დასაწყისში მხარდაჭერა გამოუცხადა სამხრეთ-დასავლეთ საფრანგეთში მიმდინარე მასშტაბურ ხანძრებთან მებრძოლ მეხანძრეებს და წარმატებები უსურვა დიდიე დეშამს.
