ისაკ ჰაჯარი მომავალი სეზონიდან რედ ბულში მაქს ვერსტაპენის ახალი თანაგუნდელი იქნება. იუკი ცუნოდა კი ადგილს თმობს და 2026 წელს ის სათადარიგო გუნდ რეისინგ ბულსშიც აღარ იქნება.
ამ ინფორმაციას De Telegraaf-ის რამდენიმე წყარო ადასტურებს. კვირას, დოჰაში ვერსტაპენის გამარჯვების შემდეგ, რედ ბულში უმაღლესი დონის შეხვედრა გაიმართა, რომელშიც გუნდის ხელმძღვანელი ლორენ მეკისი, მთავარი მრჩეველი ჰელმუტ მარკო, CEO ოლივერ მინცლაფი და სხვა პირები მონაწილეობდნენ. მეკისმა დაადასტურა, რომ რედ ბული მომავალი წლის პილოტებს სამშაბათს გამოაცხადებს.
თუმცა აშკარაა, რომ საბოლოო გადაწყვეტილებები სწორედ ამ შეხვედრაზე მიიღეს. ჰაჯარის დაწინაურება მოულოდნელი არ ყოფილა, ეს უკვე თვეებია გეგმაშია. ფრანგ-ალჟირელი მრბოლელი რეისინგ ბულსთან ერთად შესანიშნავ სადებიუტო სეზონს ატარებს; გამორჩეული შედეგი ზანდვორტში დაკავებული მესამე პოზიცია იყო.
ცუნოდა F1-ში ადგილს კარგავს
ცუნოდა რედ ბულში ამ სეზონის საწყისი ორი რბოლის შემდეგ გადავიდა და ლიამ ლოუსონი ჩაანაცვლა, რომელმაც იაპონელს ადგილი გაუცვალა. ლოუსონი რეისინგ ბულსში დარჩება. მასთან ერთად გუნდში 18 წლის არვიდ ლინდბლადი იქნება.
ამგვარად, ცუნოდა ფორმულა 1-ში ადგილს კარგავს. მომავალ უქმეებზე აბუ დაბიში ის თავის ბოლო რბოლას ჩაატარებს რედ ბულში. იაპონელი პარასკევის პირველ ვარჯიშს გამოტოვებს, ყოველმა პილოტმა ეს წელიწადში ორჯერ უნდა გააკეთოს, რათა ახალწვეულებს მიეცეთ შანსი. ამ სესიაზე ლინდბლადი იასპარეზებს.
ცუნოდამ ამ სეზონში ჯამში 33 ქულა მოიპოვა, მაშინ როცა ვერსტაპენმა - 396. შეიძლება იუკი სათადარიგო პილოტად დარჩეს, თუმცა ეს ჯერ საბოლოოდ გარკვეული არ არის.
