თბილისის ოლიმპიურ სასახლეში მიმდინარე MMA-ის მსოფლიო ჩემპიონატის 1/2 ფინალურ ეტაპზე საქართველოს 5 წარმომადგენელი ეყოლება. შესაბამისად, ჩვენს დელეგაციას 5 მედალი აქვს განაღდებული.
მირზა გაჯიევმა, 79.4 კგ. წონით კატეგორიაში, ორი ბრძოლა მოიგო და ფინალში გადასასვლელ შეხვედრაში უკრაინელ ბოგდან ვოლოშინთან იჩხუბებს.
83.9 კგ. წონით კატეგორიაში, ასევე ორი ეტაპი გაიარა რომან ჩოჩიშვილმა, რომლის ხვალინდელი მეტოქე გერმანელი ოსკარ ზენევალდი იქნება.
97 კგ. წონით კატეგორიაში 1/4 ფინალურ ეტაპზე მხოლოდ 1 რაუნდი იჩხუბა გიორგი იმერლიშვილმა, რომელმაც პოლონელი მარეკ ვლოდარჩიკი მალევე დაანოკაუტა და 1/2 ფინალში ფრანგ ჟერემი დედეზე გავიდა.
იუნიორებს შორის, ასევე 97 კგ. წონით კატეგორიაში, სუპერ დამაჯერებლად გაიარა 1/4 ფინალური ეტაპი ლექსო საბანაძემ - უკრაინელ ვოლოდიმირ შჩერბანს ტექნიკური ნოკაუტით აჯობა. 20 წლის საბანაძე, ფინალში გადასასვლელად, სამხრეთ აფრიკელ მოჰამმედ მოტალას დაუპირისპირდება.
ქალებს შორის, 79.4 კგ. წონით კატეგორიაში, პირდაპირ 1/2 ფინალშია დაშვებული მარიამ თოფურია, რომელიც ხვალ ბულგარელ სილვია სპასოვასთან იჩხუბებს და ფინალში გასვლას შეეცდება.
თოფურიას მსგავსად, პირდაპირ 1/2 ფინალშია გია გათიკაშვილი, რომელიც, იუნიორებს შორის, 83.9 კგ. წონითი კატეგორიის ფინალის საგზურის მოსაპოვებლად იტალიელ დანიელ ბუჩურთან იჩხუბებს.
ასე რომ, საქართველოს ნაკრები თბილისში მიმდინარე მსოფლიო ჩემპიონატზე გარანტირებულად 6 მედალს მოიპოვებს, დარჩენილ 3 დღეში კი მათი სინჯი გაირკვევა და ასევე ის, გვეყოლება თუ არა ახალი მსოფლიო ჩემპიონი ან ჩემპიონები.
ბრძოლები თბილისში, უნივერსიტეტის ქუჩაზე მდებარე ოლიმპიურ სასახლეში ტარდება. გულშემატკივარს ადგილზე მისვლა და ქართველების ტრიბუნიდან მხარდაჭერა სრულიად უფასოდ შეუძლია. 30 სექტემბერს, 1/2 ფინალური ჩხუბები დილის 11:00 საათიდან დაიწყება. ჩემპიონატი 2 ოქტომბერს სრულდება.
