ინგლისის პრემიერ ლიგა 2-ის მე-6 ტურში ბორნმუთის 21-წლამდე გუნდმა საკუთარ მოედანზე ბრენტფორდს უმასპინძლა და უხვგოლიან შეხვედრაში 3:4 დამარცხდა.
მარცხის მიუხედავად, მატჩის ერთ-ერთი მთავარი გმირი 19 წლის ქართველი გარემარბი გიორგი ჩუბინიძე გახდა.
შეხვედრაში ანგარიში სწორედ ჩუბინიძემ გახსნა. სტანდარტული სიტუაციის გათამაშებისას მან საჯარიმოში ყველას დაასწრო, ბურთი ჰაერში გარე ტერფით მიიღო და ზუსტად დაარტყა.
პირველი ტაიმის მიწურულს, 45-ე წუთზე, ქართველმა ფეხბურთელმა მარჯვენა ფლანგზე იაქტიურა, მცველი ჩამოიცილა და საჯარიმოში თანაგუნდელ ჩარლი სტივენსს საგოლე გადაცემა გაუკეთა. ჩუბინიძე 88-ე წუთზე, 3:3 ანგარიშის დროს შეცვალეს.
ქართველი შემტევისთვის ოქტომბრის თვე განსაკუთრებით შედეგიანი აღმოჩნდა. მან ბორნმუთის ახალგაზრდულ გუნდში ზედიზედ მესამე მატჩში მოახერხა თავის გამოჩენა.
ბოლო სამ შეხვედრაში (პლიმუთთან, ბრაიტონთან და ბრენტფორდთან) ჩუბინიძის ანგარიშზე 3 გოლი და 6 საგოლე პასია.
