ადამიანი ობობა აგენტის ამპლუაში

ჰოლივუდისა და პრემიერლიგის სამყარო ერთმანეთს სრულიად მოულოდნელად შეეჯახა.

მანჩესტერ სიტის ვარსკვლავმა, ერლინგ ჰოლანდმა ჰოლივუდის სუპერვარსკვლავ ტომ ჰოლანდთან თავის უცნაურ მიმოწერაზე საჯაროდ ისაუბრა. როგორც ირკვევა, ცნობილი მსახიობი და ტოტენჰემის თავგამოდებული ფანი, ნორვეგიელი ფორვარდის სპურსში გადაბირებას აქტიურად ცდილობდა.

ისტორია 2021 წლის მონაკოს გრან-პრიდან იწყება, როცა ჰოლანდი დორტმუნდის ბორუსიაში 41-გოლიანი სეზონის შემდეგ მსოფლიოს ყველაზე მოთხოვნადი ფეხბურთელი იყო. ტომ ჰოლანდმა მას მისწერა: "გამარჯობა მეგობარო, მონაკოში დაგინახე. თუ სადმე დალევა გინდა, შემეხმიანე. და გთხოვ, ტოტენჰემში გადმოდი რა."

ნორვეგიელმა ვარსკვლავმა ეს მესიჯი უბრალოდ დააიგნორა. თავის YouTube არხზე ერლინგმა ახსნა, თუ რატომ მოიქცა ასე: მას წარმოდგენა არ ჰქონდა, ვინ იყო ტომ ჰოლანდი: "ეგ ხომ 'ადამიანი ობობაა', მე კი 'ადამიან ობობას' საერთოდ არ ვუყურებ," - განაცხადა სიტის თავდამსხმელმა.

მოგვიანებით გავრცელდა ხმები, თითქოს ფეხბურთელმა მსახიობს უხეშად უპასუხა, რის გამოც ერლინგმა სიტუაციის განმუხტვა სცადა და მას პირადად მისწერა:

ამბობენ, თითქოს გაიგნორებდი. მინდა იცოდე, რომ ეს განზრახ არ გამიკეთებია. და სხვათა შორის, ამ ეტაპზე ტოტენჰემში ტრანსფერში დარწმუნებული არ ვარ, მაგრამ მომავალში ვინ იცის?

ჯიმი ფელონის შოუში სტუმრობისას, ტომ ჰოლანდმა ამ ისტორიაზე იხუმრა და აღნიშნა, რომ ასეთი "დამიწება" მსახიობებისთვის ზოგჯერ ძალიან სასარგებლოა. მსახიობს ეგონა, რომ 2026 წლის მსოფლიო ჩემპიონატის მეოთხედფინალში ინგლისის მიერ ნორვეგიის (2:1) დამარცხების შემდეგ, ჰოლანდი მასთან სადილზე საბოლოოდ იტყოდა უარს და გულდაწყვეტილი იქნებოდა. თუმცა, ინსტაგრამზე ინტერვიუს ვიდეოს გავრცელების შემდეგ, ერლინგმა მსახიობს კომენტარებში საჯაროდ უპასუხა: "სადილზე მოწვევა მიღებულია. ცოტა დაგვიანებით. უბრალოდ მითხარი სად!"