ადრიენ რაბიო მოდრიჩით აღფრთოვანებულია

ადრიენ რაბიო მოდრიჩთან ერთად თამაშსა და მილანში ალეგრის გავლენაზე საუბრობს.

ადრიენ რაბიო მიმდინარე სეზონში მილანის ერთ-ერთ საკვანძო მოთამაშედ ჩამოყალიბდა. Rivista Undici-სთან ვრცელ ინტერვიუში ფრანგმა ნახევარმცველმა სან სიროზე, ლუკა მოდრიჩისადმი აღფრთოვანებასა და შავ-წითელი ფორმით საკუთარ ამბიციებზე ისაუბრა.

იუვენტუსისა და პსჟ-ს ყოფილი ფეხბურთელი მილანში მარსელიდან რთული პერიოდის შემდეგ მოვიდა, თუმცა გუნდში საკუთარი კვალის დატოვება მალევე შეძლო.

მისი თქმით, ფსიქოლოგიური მდგრადობა ყოველთვის მისი მთავარი უპირატესობა იყო. TuttoMercatoWeb-ის მიერ გავრცელებულ ციტატებში რაბიო აღნიშნავს, რომ სწორედ ნეგატიურ მომენტებში ხდება ადამიანი უფრო ძლიერი, საკუთარი თავის რწმენა კი ის თვისებაა, რომლის გადაცემაც მას მილანის სხვა წევრებისთვის სურს.

მოდრიჩის გამძლეობამ გამაოცა

თუმცა, როგორც ჩანს, მილანში მისვლამ ყველაზე მეტად მოდრიჩით მოხიბლა. ხორვატი ლეგენდა, რომელიც უკვე 40 წლისაა, აგრძელებს დროის კანონების უარყოფას, რაც მისმა ახალმა თანაგუნდელმაც შენიშნა.

მისი ხარისხის შესახებ ყველამ ვიცოდით. რამაც გამაოცა, ეს არის მისი უნარი, 40 წლის ასაკში ოთხმოცდაათი წუთის განმავლობაში დაუღალავად ირბინოს წინ და უკან. ეს არ არის ისეთი რამ, რაც თავისთავად იგულისხმება, მას არაჩვეულებრივი ფიზიკური მონაცემები აქვს

მან ასევე ხაზი გაუსვა გასახდელში ლიდერების მნიშვნელობას და მოდრიჩის გვერდით მაინიანი და ახალწვეული ფიულკრუგი დაასახელა, როგორც ფეხბურთელები, რომლებიც გუნდის განწყობას ქმნიან. ალეგრის გავლენაზე საუბრისას კი რაბიო თბილ სიტყვებს არ იშურებდა და აღნიშნა, რომ მწვრთნელთან ერთად ყოველთვის არის ამბიცია, რომ ივარჯიშო ასი პროცენტით და ყოველი მატჩი ისე ითამაშო, თითქოს ის ბოლოა.

მისივე თქმით, მწვრთნელმა გუნდში მშვიდი და კონცენტრირებული გარემო შექმნა, სადაც ახალგაზრდა მოთამაშეები კარგად ვითარდებიან. რაბიოს პირადი მიზნები კი ამბიციურია. მას სურს თავისი სახელი მილანის ისტორიაში ჩაწეროს, ხოლო მსოფლიო ჩემპიონატის მოგება მის კარიერაში უმთავრეს ამოცანად რჩება.