კარლოს ალკარასი, დევისის თასის საუკეთესო 8 გუნდში მოსახვედრად ბრძოლაში, ესპანეთის ნაკრებს დანიასთან ვერ დაეხმარება.
ესპანეთის ჩოგბურთის ფედერაციის განცხადების მიხედვით, მსოფლიოს პირველ ჩოგანს, ახლახანს დასრულებული US Open-ის შემდეგ, მენტალური და ფიზიკური გადაღლილობა აქვს.
ესპანელებს ასევე არ ეყოლებათ ATP-ის რეიტინგის მე-16 ნომერი, ალეხანდრო დავიდოვიჩ-ფოკინა და საინტერესოა, რომ გუნდის კაპიტანი დავიდ ფერერი მათ ჩანაცვლებას არ აპირებს და სკანდინავიელთა წინააღმდეგ 4-კაციანი გუნდით თამაშს გეგმავს - ხაუმე მუნარი, პედრო მარტინესი, რობერტო კარბაიეს ბაენა და პაბლო კარენო ბუსტა. იმ ფონზე, რომ მეტოქე ოპტიმალური 6-კაციანი შემადგენლობითაა.
ესპანელებისა და დანიელების მატჩები ამ უიქენდზე გაიმართება. ესპანეთის ნაკრები ამჟამად რეიტინგის მე-7 ნაკრებია, დანია კი - მე-18. წყვილში გამარჯვებული ტიტულისთვის ბრძოლას გააგრძელებს ნოემბერში, როცა ბოლონიაში, 8 გუნდს შორის, დევისის თასის 2025 წლის ჩემპიონი გამოვლინდება.
