ლონდონის ჩელსის დროებითმა მთავარმა მწვრთნელმა, კალუმ მაკფარლეინმა დაადასტურა, რომ სტემფორდ ბრიჯის გასახდელში ჩაბი ალონსოს ოფიციალურ დანიშვნას უდიდესი აჟიოტაჟი მოჰყვა.
ინგლისის თასის ფინალში მანჩესტერ სიტისთან განცდილი მძიმე მარცხის მიუხედავად, მაკფარლეინმა გაამჟღავნა, რომ ესპანელ სპეციალისტთან მესიჯები უკვე გაცვალა და ფეხბურთელები მოტივირებულები არიან.
ჩაბი ალონსომ ჩელსისთან 4-წლიანი კონტრაქტი გააფორმა, თუმცა გუნდს ოფიციალურად ივლისიდან ჩაიბარებს. ტოტენჰემთან დაგეგმილი ლონდონური დერბის წინ, მაკფარლეინმა პრესკონფერენციაზე ალონსოსგან მიღებულ შეტყობინებაზე ისაუბრა:
პირადად ჯერ არ შევხვედრივარ, მაგრამ კვირას მან ტექსტური შეტყობინება გამომიგზავნა. შინაარსს საიდუმლოდ შევინახავ, თუმცა ძირითადად ინგლისის თასის ფინალს ეხებოდა. მოკლე, მაგრამ თბილი მიმოწერა გვქონდა. მთელი გუნდი აღფრთოვანებულია. ის უდიდესი მწვრთნელია, რომელმაც უამრავი ტიტული მოიგო და ფენომენალური საფეხბურთო კარიერა ჰქონდა. მას ყველა დიდ პატივს სცემს
მიუხედავად იმისა, რომ ჩელსისთვის მიმდინარე სეზონი ჩავარდა (გუნდი ევროთასების მიღმა დარჩა), მაკფარლეინი მიიჩნევს, რომ მსოფლიოს ერთ-ერთი ყველაზე მოთხოვნადი მწვრთნელის თანხმობა კლუბის უმაღლეს სტატუსზე მეტყველებს. მისი თქმით, ჩელსის ახალგაზრდულმა და ნიჭიერმა შემადგენლობამ ესპანელი სპეციალისტი მარტივად მიიზიდა.
სანამ ალონსოს ეპოქა ოფიციალურად დაიწყება, ჩელსის მიმდინარე სეზონში ორი მატჩი დარჩა ჩასატარებელი დროებითი შტაბის ხელმძღვანელობით, სამშაბათს ტოტენჰემთან, ხოლო ბოლო ტურში სანდერლენდის წინააღმდეგ.
