„ისე იქცევიან, თითქოს დროებითი მწვრთნელი ჰყავთ“ — რეალის ფეხბურთელები არბელოას გადაწყვეტილებებს ვერ იგებენ.
ჟურნალისტმა ანტონ მეანამ El Larguero-ს ეთერში რეალის გასახდელში არსებულ ვითარებაზე ისაუბრა. მისი თქმით, ფეხბურთელები ალვარო არბელოას გადაწყვეტილებების მიმართ სკეპტიკურად არიან განწყობილნი და მას ისე აღიქვამენ, როგორც კასტილიის მწვრთნელს ან მთავარი მწვრთნელის მოვალეობების დროებით შემსრულებელს.
„ატმოსფერო გუნდში საგრძნობლად გაუმჯობესდა და სწორედ ამიტომ მიიჩნევს კლუბი, რომ მწვრთნელის შეცვლა გამართლებული იყო. ჩაბი ალონსოსა და მოთამაშეებს შორის დაძაბულობამ პიკს მიაღწია, რაც კარგს არაფერს მოასწავებდა. თუმცა, ახლა სხვა პრობლემა გაჩნდა — არბელოა მოთამაშეებთან იმდენად კომუნიკაბელურია, რომ ზოგს ეს ზედმეტიც კი ჰგონია“, — აცხადებს მეანა.
ჟურნალისტის თქმით, ფეხბურთელებში გაკვირვება გამოიწვია იმ ფაქტმა, რომ სებალიოსს ბენფიკასთან გასვლით მატჩში სათამაშო დრო საერთოდ არ მიეცა, რაზეც მათ მწვრთნელს პირდაპირ მიუთითეს. რაიო ვალეკანოსთან მატჩის შემდეგ კი გასახდელში ხანგრძლივი და მწვავე დისკუსია გაიმართა ტაქტიკურ და ტექნიკურ დეტალებზე, სადაც მოთამაშეებსა და არბელოას შორის აზრთა სხვადასხვაობა დაფიქსირდა. ამის გამო, მწვრთნელმა მატჩის შემდგომ პრესკონფერენციაზე თითქმის ერთი საათით დააგვიანა.
„ზოგიერთი ფეხბურთელი მწვრთნელის ცვლილებისგან მეტს ელოდა. ისინი ამბობენ, რომ მუშაობაა საჭირო და წუწუნი არ შეიძლება, თუმცა მათი ქცევა მაინც იმაზე მეტყველებს, რომ არბელოას ავტორიტეტი გუნდში ჯერჯერობით მყარი არ არის“, — დასძინა ჟურნალისტმა.
