„ალონსოს წასვლა წაგვადგა", — რეალში გადაწყვეტილებით ბედნიერები არიან

ჩაბი ალონსოს მთავარი მწვრთნელის პოსტიდან წასვლისა და ალვარო არბელოას დანიშვნის შემდეგ, რეალში ატმოსფერო გაუმჯობესდა.

შაბათს მადრიდულმა კლუბმა ლა ლიგის 21-ე ტურში ვილიარეალი 2:0 დაამარცხა.

ამ მატჩის წინ, ჩაბი ალონსოს ყოფილი სამწვრთნელო შტაბის წევრებთან დაახლოებულმა წყაროებმა The Athletic-ს უთხრეს, რომ მათი აზრით, რეალში მდგომარეობა ახლა უკეთესობისკენ წავა, რადგან ფეხბურთელები მოისურვებენ კრიტიკაზე რეაგირებას და საკუთარი შესაძლებლობების დამტკიცებას.

ამ მოსაზრებას დაეთანხმნენ სხვა წყაროებიც, რომლებიც გუნდის რამდენიმე წევრთან არიან ახლოს.

რეალის გასახდელთან დაახლოებული წყაროების ინფორმაციით, ამ ეტაპზე გუნდში ატმოსფერო გაცილებით უკეთესია — ჩაბი ალონსოს პერიოდში გუნდში გარკვეული დაძაბულობა არსებობდა.

ჩაბი ალონსოს თანამდებობიდან 12 იანვარს გაათავისუფლეს, მას შემდეგ რეალმა 4 მატჩი ჩაატარა: ალბასეტესთან თასზე სენსაციურად დამარცხდა, მას შემდეგ კი ლევანტეს, მონაკოს და ვილიარეალს აჯობა.