ინტერის მთავარმა მწვრთნელმა კრისტიან კივუმ ნაპოლისთან მოახლოებულ მატჩზე ისაუბრა.
მილანელები დღეს სერია A-ს მე-20 ტურის შეხვედრაში ანტონიო კონტეს გუნდს უმასპინძლებენ. მატჩი თბილისის დროით 22:45 საათზე დაიწყება.
„მათ შეცვალეს სათამაშო სისტემა და გარკვეული ფეხბურთელებიც. ძლიერი შემადგენლობა ჰყავთ და მაღალი ინტენსივობით თამაშობენ.
ეს ორივე გუნდისთვის რთული მატჩი იქნება — თამაში, სადაც ყველა მაქსიმალურად ეცდება, რაც შეიძლება ნაკლები შეცდომა დაუშვას. ყველაფერი ეპიზოდებზე იქნება დამოკიდებული, რაც ასეთ დონეზე სრულიად ბუნებრივია.
კონტეს, როგორც მწვრთნელს, დიდ პატივს ვცემ. მას ჯერ კიდევ მაშინ შევხვედრივარ, როცა თავად ვთამაშობდი. მივულოცე ის, რაც მოახერხა — გუნდისთვის საკუთარი იდეების მოხვევა.
ჩვენ გვინდა მოვიგოთ და უპირატესობა შვიდ ქულამდე გავზარდოთ, მათ კი გამარჯვება სურთ, რათა ჩამორჩენა ერთ ქულამდე შეამცირონ. სურვილსა და რეალურ მოქმედებას შორის დიდი განსხვავებაა — საჭიროა თავგანწირვა, ამბიცია და ყველაფერი ის, რაც მოედანზე უნდა აჩვენო.
ერთი რამ ზუსტად ვიცით — ამ პერიოდში ყოველთვის კარგად ვმუშაობდით. ამ გუნდს მუდამ ჰქონდა სურვილი და ამბიცია. შესაძლოა, დღეს ეს კიდევ უფრო მკაფიოდ გამოჩნდეს. გვესმის, რომ ამ მატჩს სეზონის მსვლელობაზე გავლენის მოხდენა შეუძლია.
კონტე განვითარდა და აკეთებს ისეთ რამეებს, რომლებიც თანამედროვე ფეხბურთს მეტად შეესაბამება. ის გამარჯვებულია და ჩვენ, ახალგაზრდა მწვრთნელებს, მისგან ბევრი გვაქვს სასწავლი. ეს არ არის შედარება მასა და ჩემს შორის — ფეხბურთში მთავარი ფიგურები მოთამაშეები არიან“, — ციტირებს კივუს FcInter1908.
