ოვიედოსთან გუშინდელი მატჩის შემდეგ, რომელშიც კილიან მბაპე მოედანზე ცვლილებაზე შევიდა და გულშემატკივართა სტვენის ობიექტიც გახდა, ფრანგმა სკანდალური ინტერვიუ მისცა.
„დღევანდელ მატჩში სასტარტოში მოსახვედრად მზად ვიყავი, მაგრამ არბელოამ მითხრა, რომ დღევანდელი თამაშისთვის გუნდში მხოლოდ მეოთხე თავდამსხმელი ვიყავი მასტანტუონოს, ვინისიუსისა და გონსალოს შემდეგ. ნებისმიერ შემთხვევაში, მწვრთნელის გადაწყვეტილებას ყოველთვის პატივი უნდა სცე. მეტი მუშაობა მჭირდება, რომ მათ ვაჯობო.
ჩემი მოგზაურობა იტალიაში? ამაზე კლუბისგან ნებართვა მქონდა. იმ მომენტში ესპანეთი მადრიდის მხოლოდ მე არ დამიტოვებია. დავუშვი თუ არა შეცდომა იტალიაში წასვლით? ჩემი შეცდომა ისაა, რომ ამ სეზონში ტიტულები ვერ მოვიგეთ.
ჩემი მომავალი? რეალის დატოვება არ მინდა. რატომ უნდა წავიდე?!
სტვენისგან არავინ მოკვდება
დღეს ბერნაბეუზე ფანებმა დამისტვინეს? ეს ცნობილი ფეხბურთელის ცხოვრების ნაწილია, ამისგან არავინ მოკვდება.
ამ სეზონის შედეგები მტკივნეულია, რადგან მიმდინარე სეზონის სტარტზე ვაჩვენეთ, რომ დიდი საქმეების გაკეთება შეგვეძლო. გვარების დასახელებას არ ვაპირებ, აქ მხოლოდ კლუბის დასაცავად ვარ. ნებისმიერ შემთხვევაში, უტიტულოდ დარჩენა მხოლოდ და მხოლოდ ჩვენი ბრალია.
ალონსოსთან შესანიშნავი ურთიერთობა მაქვს. ყველამ იცის, რას ვფიქრობ მასზე, მაგრამ ეს უკვე წარსულია. სეზონი კარგად დავიწყეთ, მაგრამ მეორე ნახევარში ყველაფერი დავკარგეთ. ვგრძნობ, რომ გვქონდა თამაშის სტილი, სტრუქტურა... და ეს ყველაფერი დავკარგეთ.
როგორ შეიძლება არბელოასთან პრობლემა მქონდეს?!
ახლა წინ უნდა ვიყუროთ და იმაზე ვიფიქროთ, რა გავაუმჯობესოთ. არბელოასთან პრობლემა არ მაქვს. როგორ შეიძლება მქონდეს პრობლემა მწვრთნელთან მხოლოდ იმიტომ, რომ არ ვთამაშობ?! ყველა სპეციალისტს თავისი ფილოსოფია და იდეები აქვს.
ტრავმა, რომლის გამოც კლასიკო გამოვტოვე, ცოტა მტკივნეული იყო. მეწყინა, რომ ბარსელონას წინააღმდეგ ვერ ვითამაშე, რადგან მათთან თამაში მიყვარს და ყოველთვის გამაქვს გოლები მათ კარში.
მწყინს, როცა ამბობენ, რომ მოედანზე შეგნებულად არ გავდივარ
ჩემი ფორმა? მიმდინარე სეზონში მართლაც რაღაც მაკლდა. მუხლის ტრავმა ჩემთვის ნამდვილი თავისტკივილი იყო. თავიდან მადრიდის სამედიცინო შტაბმა არასწორი მუხლი გამომიკვლია? მადრიდი არასდროს ცდება. ეს მსოფლიოს საუკეთესო კლუბია. ნებისმიერ შემთხვევაში, მტკენს ის ფაქტი, როცა ამბობენ, თითქოს მოედანზე გასვლა არ მინდა, მე ხომ ყოველთვის მინდა თამაში.
ბევრს თამაშობსო... არ ვითამაშე და გამოვვარდით
სეზონის პირველ ნახევარში ზოგიერთი ფანი ამბობდა, რომ მეტი დასვენება მჭირდებოდა, რადგან ბევრს ვთამაშობდი. ახლა კი იგივე ხალხი ამბობს, რომ თამაში არ მინდა! ამას აზრი არ აქვს. მაგალითად, არ მივიღე მონაწილეობა თასის მატჩში ალბასეტესთან და მაშინ გამოვვარდით ტურნირიდან.
ჩხუბი ჩუამენისა და ვალვერდეს შორის? როდესაც მადრიდის საწვრთნელი ბაზა დავტოვე, ამის შესახებ არაფერი ვიცოდი.
პერესი მსოფლიოს საუკეთესო პრეზიდენტია. გვიმართლებს, რომ ის გვყავს. არ დაგავიწყდეთ, რა გააკეთა ფლორენტინომ მადრიდისთვის.
