კილიან მბაპემ ოვიედოსთან მოგებული მატჩის (2-0) შემდეგ მადრიდის რეალის ირგვლივ არსებულ სკანდალებზე პირველად ისაუბრა.
ფრანგი ფორვარდი, რომელმაც ტრავმის გამო რამდენიმე შეხვედრა გამოტოვა, მოედანზე მეორე ტაიმში გამოჩნდა, თუმცა საკუთარი გულშემატკივრებისგან სტვენა და უკმაყოფილო შეძახილები დაიმსახურა.
სტვენა და იტალიური ვოიაჟი
მბაპემ აღნიშნა, რომ სტვენა ფეხბურთის ნაწილია და გაბრაზებული ადამიანების აზრის შეცვლა შეუძლებელია. მან სინანული გამოთქვა ელ კლასიკოს გამოტოვების გამო და უპასუხა კრიტიკას მის იტალიაში მოგზაურობაზეც. მბაპეს თქმით, მას კლუბისგან ნებართვა ჰქონდა და ის არ ყოფილა ერთადერთი მოთამაშე, რომელიც მადრიდში არ იმყოფებოდა.
კონფლიქტი არბელოასთან
ყველაზე სენსაციური განცხადება მთავარ მწვრთნელს, ალვარო არბელოას ეხებოდა. ფრანგმა აღნიშნა, რომ მწვრთნელმა ის გუნდში მეოთხე თავდამსხმელად დაასახელა"
რატომ ვერ ვითამაშე ელ კლასიკოში? ჰკითხეთ მწვრთნელს. მე მზად ვიყავი, მაგრამ ეს მისი გადაწყვეტილებაა. მან მითხრა, რომ შემადგენლობაში მეოთხე თავდამსხმელი ვარ. მასზე ვერ გავბრაზდები, მწვრთნელის აზრს პატივი უნდა ვცე. უნდა ვიმუშაო, რომ ვიყო უკეთესი, ვიდრე ვინი, მასტანტუონო და გონსალო.
მხარდაჭერა პრეზიდენტს
მიუხედავად გუნდში არსებული დაძაბულობისა, კილიანმა სრული მხარდაჭერა გამოუცხადა ფლორენტინო პერესს. მან პერესს მსოფლიოს საუკეთესო პრეზიდენტი უწოდა და აღნიშნა, რომ მის მიმართ გამოთქმული კრიტიკა დაუმსახურებელია, რადგან არ შეიძლება დავივიწყოთ ყველაფერი, რაც მან კლუბისთვის გააკეთა.
