"არგენტინა ჩემი სიყვარულია" - ალბისელესტე მფარველ ანგელოზს დაემშვიდობა

კოპა ამერიკა 2024-ის ფინალში არგენტინის ნაკრებმა კოლუმბია დაამარცხა და კონტინენტის რეკორდული, მე-16 ჩემპიონობა მოიპოვა.

მატჩი გამორჩეული იყო იმითაც, რომ არგენტინელთა შემადგენლობაში ბოლო მატჩი ჩაატარა ანხელ დი მარიამ - მოთამაშემ, რომელმაც ამ გუნდთან ერთად დიდი ისტორია შექმნა და თავადაც ამ ყველაფრის ერთ-ერთი შემოქმედი იყო.

დი მარიამ ალბისელესტესთან ერთად კოპა ამერიკა (2-ჯერ), მსოფლიო ჩემპიონატი და ფინალისიმა მოიგო, ანხელმა კი გოლის გატანა ზედიზედ სამ ფინალურ მატჩში შეძლო, რითიც არგენტინის ნაკრების ტრიუმფში უდიდესი როლი ითამაშა.

შეიძლება ისიც ითქვას, რომ რიგ შემთხვევებში არგენტინა დი მარიასთან ერთად და მის გარეშე ორი სხვადასხვა გუნდი იყო და გადამწყვეტ მომენტებში გუნდს მფარველ ანგელოზად სწორედ ის ევლინებოდა - ამაზე დიდი სანაკრებო ტურნირების ფინალში გატანილი გოლებიც მეტყველებს.

დი მარიამ ნაკრებში ჯამში 145 მატჩი ჩაატარა და 31 გოლის გატანა შეძლო, გუშინ კი ეროვნულ გუნდს ჩემპიონის რანგში დაემშვიდობა.

"ჩემი ოცნება იყო, რომ სანაკრებო კარიერა ასე დამესრულებინა. არგენტინა ჩემი სიყვარული და ჩემი ქვეყანაა. მადლობა." - განაცხადა ფიდეომ.

დი მარია საკლუბო კარიერის კიდევ ერთ სეზონს ბენფიკაში გაატარებს, მისი და არგენტინის ისტორია კი ლამაზად დასრულდა.