გურამ თუშიშვილმა, თბილისში გამართულ ძიუდოს ევროპის ჩემპიონატზე, ოქროს მედალი მოიპოვა.
+100 კგ. წონით კატეგორიაში, გურამმა პირველ რაუნდში დაისვენა, რის შემდეგაც ერთმანეთის მიყოლებით კვიპროსელი იანის ანტონიუ, თურქი იბრაჰიმ თათაროღლუ, რუსი ვალერი ენდოვიცკი დაამარცხა და ფინალში ლეგენდარულ ჩეხ ლუკაშ კრპალეკზე გავიდა.
35 წლის კრპალეკი 2-გზის ოლიმპიური ჩემპიონია (2016; 2020), 3-ჯერ ევროპის ჩემპიონატი აქვს მოგებული და 2-ჯერ - მსოფლიო ჩემპიონატი. 2020 წლის ოლიმპიადაზე 1/2 ფინალში ტედი რინერს მოუგო, ფინალში კი სწორედ თუშიშვილს აჯობა.
კრპალეკი ძიუდოს ისტორიაში გამორჩეული და უნიკალურია იმით, რომ ოლიმპიადაზე, მსოფლიო ჩემპიონატსა და ევროპის ჩემპიონატზე ჩემპიონობა 2 სხვადასხვა წონაში აქვს მოპოვებული (-100 და +100 კგ.) - ასეთი რამ არასდროს არავის გაუკეთებია.
თუშიშვილმა მასთან ფინალური შეხვედრა სუპერ დამაჯერებლად წარმართა და კითხვის ნიშნების გარეშე დაამარცხა. შედეგად, 31 წლის ქართველმა ევროპის ჩემპიონობა მესამედ იზეიმა - 2017; 2019 და 2026.
შედეგად, გურამ თუშიშვილი ევროპის 3-გზის ჩემპიონია, ასევე მსოფლიო ჩემპიონატი აქვს მოგებული, ხოლო ოლიმპიურ თამაშებზე ვერცხლის მედლის მფლობელი გახლავთ.
საქართველოს ნაკრებმა, თუშიშვილის ჩემპიონობით, ტურნირზე მე-4 ოქროს მედალი მოიპოვა, რაც ევროპის ჩემპიონატებზე ჩვენთვის ისტორიაში საუკეთესო შედეგია - აქამდე ერთ ჯერზე 3 ჩემპიონი გვყოლია.
გურამის გარდა, წლევანდელ ევროზე ოქროს მედალი ეთერ ლიპარტელიანმა (-57 კგ.), ლაშა შავდათუაშვილმა (-73 კგ.) და ლუკა მაისურაძემ (-90 კგ.) მოიგეს, ვერცხლის მედალს გიორგი სარდალაშვილი (-60 კგ.) და ტატო გრიგალაშვილი (-81 კგ.) დაეუფლნენ, ხოლო ილია სულამანიძემ (-100 კგ.) ბრინჯაოს მედალი დაისაკუთრა.
საქართველოს ნაკრებმა ტურნირი 7 მედლით დაასრულა და საერთო ჩათვლაში პირველი ადგილი დაიკავა - 4 ოქრო, 2 ვერცხლი, 1 ბრინჯაო. მეორე ადგილზე საფრანგეთის ნაკრები გავიდა (2 ოქრო, 4 ვერცხლი, 6 ბრინჯაო), ხოლო მესამე პოზიცია რუსეთს ერგო - 2 ოქრო, 1 ვერცხლი, 4 ბრინჯაო.
"ყველაზე მნიშვნელოვანი და ტკბილი ეს ჩემპიონობაა" - თუშიშვილი ოქროს მოგების შემდეგ
