ბაქოში მიმდინარე ძიუდოს მსოფლიო ჩემპიონატზე მე-4 დღე საქართველოს მორიგი მედლით დასრულდა.
მამაკაცთა შორის 81 კგ. წონით კატეგორიაში მოასპარეზე ტატო გრიგალაშვილმა, რომელიც მსოფლიოს 3-გზის (2022, 2023, 2024) ჩემპიონი იყო, ამ ტურნირზე მე-4 ოქროს მედალი მოიპოვა.
ქართველმა ტიტულოვანმა ძიუდოისტმა ასპარეზობა მეორე ეტაპიდან დაიწყო, სადაც არაბეთის გაერთიანებული საამიროების წარმომადგენელ ჰაჯიმურატ ომაროვი დაამარცხა.
გრიგალაშვილმა გამარჯვება და 1/8 ფინალის საგზური უპრობლემოდ მოიპოვა. ტურნირის მომდევნო ეტაპზე მისი მეტოქე შვეიცარიელი აურელიენ ბონფერონი გახლდათ, რომელიც იპონით დაამარცხა.
ტატო ამ გამარჯვებით 1/4 ფინალში გავიდა, სადაც სლოვენიელ ნასე ჰერკოვიჩს შეხვდა და ისიც დაამარცხა, ამჯერად შიდოებით.
გრიგალაშვილმა მსოფლიო ჩემპიონატის 1/2 ფინალში იასპარეზა, სადაც სერბ მიჰაილო სიმინს დაუპირისპირდა და დაძაბულ ბრძოლაში ასევე შიდოებით სძლია.
ქართველი მსოფლიო ჩემპიონატის ფინალში ზედიზედ მეექვსედ გავიდა და შესაბამისად მე-6 მედალიც გაინაღდა. გრიგალაშვილმა აქამდე 3-ჯერ ოქროს მედალი მოიპოვა, 2-ჯერ კი - ვერცხლის.
ფინალში ტატოს მეტოქე აზერბაიჯანელი ზელიმ ცკაევი იყო, რომელთანაც მძიმე ბრძოლა გამართა. გოლდენ სქორისთვის განკუთვნილი დრო დიდხანს გაგრძელდა და საბოლოოდ ქართველმა მეტოქის გატეხვა მოახერხა და იპონით ოქროს მედალი დაიმსახურა.
ტატო გრიგალაშვილი 26 წლის ასაკში უკვე 4-გზის მსოფლიო ჩემპიონია!
მიმდინარე მსოფლიო ჩემპიონატზე კი ტატომ საქართველოს ნაკრებს მე-3 მედალი მოუპოვა - ეთერ ლიპარტელიანი (ვერცხლი) და გიორგი სარდალაშვილი (ბრინჯაო).
