ისტორიული გადაწყვეტილება - არსენალი ჩემპიონთა ლიგის ფინალში საშინაო ფორმით ითამაშებს.
30 მაისს, ბუდაპეშტში გასამართ ჩემპიონთა ლიგის ფინალში პსჟ-ს წინააღმდეგ, არსენალი ისტორიაში პირველად თავისი ტრადიციული საშინაო ფორმით ითამაშებს.
მიუხედავად იმისა, რომ ლონდონური კლუბი სტუმრის სტატუსით გამოდის, დადასტურდა, რომ გუნდი მოედანზე წითელი მაისურებით, თეთრი შორტებითა და წითელი წინდებით გავა, ხოლო მეკარე დავიდ რაია ყვითელ ფორმას მოირგებს.
ეს გადაწყვეტილება მნიშვნელოვანია იმითაც, რომ კლუბის ერთადერთ წინა ფინალში, რომელიც 20 წლის წინ ბარსელონასთან გაიმართა, მეთოფეები სტუმრის ყვითელი ფორმით ასპარეზობდნენ. თავის მხრივ, პსჟ საკუთარი საშინაო ფორმით შეეცდება ჩემპიონთა ლიგის ტიტულის დაცვას.
ფინალამდე არსენალმა ნახევარფინალში მადრიდის ატლეტიკო დაამარცხა, რითაც კლუბის ისტორიაში მეორედ მოიპოვა ევროპის უმთავრესი ტურნირის გადამწყვეტ მატჩში თამაშის უფლება.
