ჟურნალისტ ბენ ჯეიკობსის ინფორმაციით, არსენალი მადრიდის რეალის შემტევის, როდრიგო გოეშის მიმართ ინტერესს ინარჩუნებს.
ლონდონური კლუბი რეალს ბრაზილიელი ვინგერის თაობაზე დაეკონტაქტა და შეიტყო, რომ სამეფო კლუბს ფეხბურთელის სანაცვლოდ დაახლოებით 90 მილიონი ევროს მიღება სურს.
მეორეს მხრივ, რეალის პრიორიტეტი ფეხბურთელის გაყიდვა არ არის და მას მხოლოდ იმ შემთხვევაში შეელევა, თუ თავად როდრიგო მოისურვებს კლუბის დატოვებას.
თავად ბრაზილიელი ჩაბი ალონსოს გაესაუბრა და მისგან შეიტყო, რომ მწვრთნელი მასზე იმედებს ამყარებს და მისი შენარჩუნება სურს.
ესპანური პრესა წერს, რომ ალონსოსთან საუბრის შემდეგ, როდრიგო ვარჯიშებზე გაბადრული ჩანს და გაცილებით დიდი მოტივაციით და მონდომებით მუშაობს.
თუმცა, ეს იმას სულაც არ ნიშნავს, რომ ამ ზაფხულს როდრიგოს სანტიაგო ბერნაბეუზე დარჩენა გადაწყვეტილი ამბავია.
