სიტის მატჩი და სამწვრთნელო დებიუტები - საინტერესო დღე საკლუბო მუნდიალზე

მსოფლიო საკლუბო ჩემპიონატზე ჯგუფური ეტაპის პირველი წრე დასასრულს უახლოვდება, დღეს კი საქმეში ტურნირის ერთბაშად ორი ფავორიტი ჩაერთვება.

20:00 მან სიტი - ვიდადი

თბილისის დროით საღამოს რვა საათზე პეპ გვარდიოლას მან სიტი მაროკოულ კლუბ ვიდადს დაუპირისპირდება და ჯგუფში პირველი ქულების მოპოვებას შეეცდება.

გვარდიოლას გუნდი ამ ტურნირის წინ საგრძნობლად გაძლიერდა, განსაკუთრებით აღსანიშნავია ტიჯანი რეინდერსის და რაიან შერკის ტრანსფერები, რომლებიც თავისუფლად შესაძლებელია რომ საქმეში დღესვე ვიხილოთ.

ესპანელ სპეციალისტს მსოფლიო საკლუბო ჩემპიონატი სხვადასხვა წლებში 4-ჯერ აქვს მოგებული. ისტორიაში არცერთ სხვა მწვრთნელს ამაზე მეტჯერ აღნიშნული ტიტული არ მოუგია.

მან სიტის და ვიდადის გზები პირველად გადაიყრება.

23:00 რეალი - ალ ჰილალი

საღამოს მატჩში კი ცნობილი მწვრთნელების დებიუტებს ვიხილავთ - ჩაბი ალონსო რეალის სათავეში გამართავს თავის პირველ შეხვედრას, ალ ჰილალს კი კარიერაში პირველად სიმონე ინძაგი გაუძღვება, რომელმაც გუნდი ჩემპიონთა ლიგის ფინალის შემდეგ ჩაიბარა.

განსაკუთრებული ინტერესით ელოდება ხალხი მადრიდელების გამოსვლას, სადაც, როგორც ესპანურმა პრესამ შერაცხა - ჩაბი ალონსოს ერა იწყება, რომელიც, იმავე პრესაზე დაყრდნობით, ვარჯიშებზე ძალიან მომთხოვნია და თავის ფეხბურთელებს მაღალ ინტენსივობას და აქტიურ პრესინგს სთხოვს.

რეალისა და ალ ჰილალის გზები აქამდე ისტორიაში მხოლოდ ერთხელ, სწორედ მსოფლიო საკლუბო ჩემპიონატზე, ორი წლის წინ გადაიკვეთა, როცა ვინისიუსის და ბენზემას თავოსნობით მადრიდელებმა 5:3 მოიგეს და ტიტულს დაეუფლნენ.