არსენალმა პსჟ-ის ახალგაზრდა მცველთან მოლაპარაკებები დაიწყო

ლონდონის არსენალმა პარი სენ-ჟერმენის 18 წლის მცველის, ემანუელ მბემბას თავისუფალი აგენტის სტატუსით აყვანის მიზნით პირველი ნაბიჯები გადადგა.

პარიზულმა კლუბმა ფრანგ ახალგაზრდას ახალი კონტრაქტი შესთავაზა, თუმცა ფეხბურთელი პრემიერ ლიგაში გადასვლის მომხრეა. ივნისის ბოლოს, ხელშეკრულების ამოწურვის შემდეგ, ინგლისურ გუნდს მისი მომზადების კომპენსაციის სახით მხოლოდ 150 000 ფუნტზე ოდნავ მეტის გადახდა მოუწევს.

მეთოფეები მბემბას უკვე დაუკავშირდნენ და საკუთარი გეგმები გააცნეს. მაგალითად მათ უილიამ სალიბას შემთხვევა მოუყვანეს, რომელმაც მარსელში იჯარით თამაშისას სერიოზული პროგრესი განიცადა. თავად მბემბა უპირატესობას არსენალს ანიჭებს, რადგან მოხიბლულია მიკელ არტეტას ხელმძღვანელობით გუნდში არსებული სტაბილურობითა და წარმატებებით.

ლონდონელთა გეგმის მიხედვით, მბემბა 2027 წლის იანვრამდე ევროპულ კლუბში იჯარით გაიგზავნება, რათა ამ დროში ინგლისში თამაშის უფლების (სამუშაო ნებართვის) მიღება უპრობლემოდ შეძლოს. პსჟ-ის აკადემიაში ის ძირითადად ცენტრალურ მცველად თამაშობდა და ახლახან მისმა კაპიტნობამ გუნდს საფრანგეთის ახალგაზრდული თასი მოაგებინა, თუმცა არსენალი მას გრძელვადიან პერსპექტივაში მარცხენა მცველის პოზიციაზე განიხილავს.