ათასობით ცარიელი ადგილი - ბილეთების სკანდალი მუნდიალზე

2026 წლის მსოფლიო ჩემპიონატზე ბილეთების ფასებთან დაკავშირებული სკანდალი გრძელდება.

გვადალახარაში, ესტადიო აკრონზე გამართულ სამხრეთ კორეისა და ჩეხეთის დაპირისპირებაზე, მიუხედავად მატჩის დრამატული ხასიათისა, ტრიბუნებზე ათასობით ცარიელი ადგილი შეინიშნებოდა.

ფეხბურთის გულშემატკივრები უკმაყოფილებას გამოხატავენ ფიფას დინამიური ფასების პოლიტიკის გამო. ფინალური მატჩის ყველაზე იაფი ბილეთის ფასი დაახლოებით 5 785 დოლარს აღწევს, ხოლო ზოგიერთი კატეგორიის ბილეთების ფასი ხუთნიშნა ციფრებშია. ამ ფონზე, ტურნირის დაწყებამდე ოფიციალურ პორტალებზე კვლავ რჩებოდა დაახლოებით 180 000 გაუყიდავი ბილეთი.

ფიფას პრეზიდენტი ჯანი ინფანტინო აღნიშნულ პოლიტიკას იცავს და მას მსოფლიო ჩემპიონატის მასშტაბით ამართლებს, თუმცა ფაქტია, რომ მაღალმა ფასებმა და ბილეთების შეძენის პროცესთან დაკავშირებულმა გაურკვევლობამ გულშემატკივრების ნაწილი დააფრთხო. ნიუ-იორკსა და ნიუ-ჯერსიში პოლიტიკოსებმა უკვე დაიწყეს ოფიციალური გამოძიება ფიფას მიერ დაწესებული გაბერილი ფასებისა და ბილეთების გაყიდვის პროცესში არსებული გაუმჭვირვალობის შესახებ.

თავად მატჩი, რომელშიც სამხრეთ კორეამ ჩეხეთი 2-1 დაამარცხა, მაინც ცოცხალი და დაძაბული გამოდგა. ჩეხები ლადისლავ კრეიჩის გოლით დაწინაურდნენ, თუმცა ჰვან ინ ბეომის გათანაბრების შემდეგ, გამარჯვების გოლი ო ჰიონ გიუმ გაიტანა.