აუღებელი კამპ ნოუ: შეძლებს ნიუკასლი ბარსელონას დამარცხებას?

კამპ ნოუს ფაქტორი: ბარსელონა ნიუკასლის წინააღმდეგ მთავარი კოზირით წარსდგება

ოთხშაბათს ბარსელონა ჩემპიონთა ლიგის მერვედფინალის საპასუხო შეხვედრაში ნიუკასლს უმასპინძლებს. პირველი მატჩი სენტ ჯეიმს პარკზე ფრედ, 1:1 დასრულდა, რაც იმას ნიშნავს, რომ შემდეგ ეტაპზე გასასვლელად ნებისმიერი ანგარიშით მოგება საკმარისია.

ამ გადამწყვეტი მატჩის წინ კატალონიელთა სასარგებლოდ ერთი მნიშვნელოვანი სტატისტიკური ფაქტორი მეტყველებს: მათი დაუმარცხებელი სერია საკუთარ მოედანზე.

კამპ ნოუ – აუღებელი ციხესიმაგრე

როგორც გამოცემა Diario AS აღნიშნავს, მას შემდეგ, რაც ჰანსი ფლიკის გუნდი 22 ნოემბერს კამპ ნოუზე დაბრუნდა, ბარსელონა საშინაო მატჩებში უშეცდომოდ ასპარეზობს.

ფაქტობრივად, ბარსელონა ამჟამად ევროპაში საუკეთესო გუნდია საშინაო შეხვედრების მიხედვით. შინ დაბრუნების შემდეგ მათ ზედიზედ 11 მატჩი მოიგეს. ეს შთამბეჭდავი სერია ატლეტიკ ბილბაობს განადგურებით (4:0) დაიწყო და მას შემდეგ კატალონიელებმა ლა ლიგაში, ჩემპიონთა ლიგასა და თასზე ყველა მეტოქე დაამარცხეს.

ამ 11 გამარჯვების განმავლობაში ბლაუგრანამ 33 გოლი გაიტანა და მხოლოდ 6 გაუშვა. აღსანიშნავია, რომ ეს შედეგი სტადიონზე მიმდინარე სამშენებლო სამუშაოების ფონზე დაფიქსირდა. თუ პირველ ათ მატჩში ტრიბუნები მხოლოდ 42,000 მაყურებელს იტევდა, გასულ კვირას სევილიასთან მოგებულ (5:2) შეხვედრაში დასწრება 62,000-მდე გაიზარდა.

მიუხედავად იმისა, რომ ბარსელონა შინ დაუმარცხებელია, ნიუკასლი კატალონიაში საკუთარი ამბიციებით ჩადის. ინგლისურმა კლუბმა ცოტა ხნის წინ სტემფორდ ბრიჯზე ჩელსის მოუგო, ჯგუფურ ეტაპზე კი პარიზში პსჟსთან ფრე ითამაშა. შესაბამისად, ხვალინდელ მატჩში კამპ ნოუზე უდიდესი ბრძოლაა მოსალოდნელი.