... 1978 წლის 21 ივნისი, არგენტინის ქალაქი კორდობა, „ესტადიო ოლიმპიკო შატო კარერასი“, ავსტრიისა და გფრ-ის ნაკრებების პრინციპული მატჩის 87-ე წუთზე, როდესაც ანგარიში საყაიმოა, გერმანელთა საჯარიმოში მარცხენა ფრთიდან შეჭრილი ჰანს კრანკლი იოლად ატყუებს მცველ მანფრედ კალცს და ცაციით ოსტატურად უტანს მეკარე ზეპ მაიერს. მთელი ავსტრია სიხარულისგან შოკშია, ცნობილი კომენტატორი ედუარდ ფინგერი კი სიხარულისგან ჭკუიდან იშლება: "Tor! Tor! Tor! Tor! Tor! Tor! I wer' narrisch!..."
შორეულ წარსულში ავსტრიის საფეხბურთო ნაკრები ინოვაციურ და ევროპაში ერთ-ერთ საუკეთესო გუნდად მიიჩნეოდა. ლეგენდარულმა „ვუნდერტიმმა“ 1930-იანი წლების პირველ ნახევარში ევროპა გააოცა „დუნაის მორევად“ წოდებული თავისი სათამაშო სტილით, რომელიც დაფუძნებული იყო ორიგინალურ პასებსა და ფეხბურთელების ურთიერთშემცვლელობაზე.
ავსტრიის ეროვნულ ნაკრებს ვენის აუსტრიას წევრი, ჩეხური ფესვების მქონე მათიას (მაცეი) შინდელარი ლიდერობდა. არაჩვეულებრივი ოსტატობის მქონე თავდამსხმელს თავისი აღნაგობის გამო მეტსახელად „ქაღალდის კაცი“ (De Papieren) შეარქვეს.
„ანშლუსის“ გამო ავსტრიამ 1938 წლის მუნდიალზე მონაწილეობა ვეღარ მიიღო. ევროპაში ფაშიზმის გაბატონებისა და მსოფლიო ომის დაწყების შემდეგ კი ბევრი ფიქრობდა, რომ ავსტრიას აღარასოდეს ეყოლებოდა ისეთი ნაკრები, როგორიც მწვრთნელმა ჰუგო მაისლმა შექმნა.
ოთხი ათწლეულის განმავლობაში მათიას შინდელარის, როგორც ქვეყნის საუკეთესო ფეხბურთელის სტატუსი, კამათს არ იწვევდა იქამდე, სანამ ახალი ვარსკვლავი, ჰანს კრანკლი არ გამოჩნდა.
იოჰან (ჰანს) კრანკლი 1953 წელს ვენაში დაიბადა. კარიერა 1970 წელს დედაქალაქურ რაპიდში დაიწყო და სადებიუტო სეზონში თითზე ჩამოსათვლელი ნათამაშები მატჩების შემდეგ, ვინერში განათხოვრებულმა ავსტრიის პირველობის 26 მატჩში 27 გოლი გაიტანა. რაპიდმა ახალგაზრდა ფორვარდი მყისვე დაიბრუნა და 1978 წლამდე, კრანკლის ანგარიშზე, რაპიდის მაისურით ყველა ტურნირზე ჩატარებულ 252 მატჩში 185 გოლია.
საინტერესოა ის, რომ მიუხედავად რვაწლიან პერიოდში გატანილი უამრავი გოლისა, ჰანს კრანკლის ერთადერთი ტიტული 1976 წელს მოგებული ავსტრიის თასია.
1977-78 წლების სეზონი კრანკლის კარიერაში საუკეთესოა. ავსტრიის ბუნდესლიგის 36 შეხვედრაში მან 41 ბურთი შეაგდო, მათ შორის 6 ჰეთ-თრიქი და ევროპის „ოქროს ბუცი“ მოიგო.
ინდივიდუალური მიღწევების მიუხედავად, ავსტრიის საფეხბურთო ჩემპიონატის მოკრძალებულობის გამო, კრანკლი ევროპის ელიტარულ მოთამაშედ ჯერ კიდევ არ ითვლებოდა, თუმცა არგენტინის 1978 წლის მსოფლიო ჩემპიონატმა მისი კარიერა და სტატუსი შეცვალა.
მუნდიალზე კრანკლმა გამარჯვების გოლები ქვეჯგუფში, ესპანეთთან (2:1) და და შვედეთთან (1:0) გაიტანა. ბრაზილიასთან მე-3 ტურში წაგების (0:1) მიუხედავად, ავსტრიელებმა ჯგუფი პირველ ადგილზე დაასრულეს და მეორე ეტაპზე გავიდნენ, იქ კი ე.წ. სიკვდილის ჯგუფში აღმოჩნდნენ. ჰელმუტ სენეკოვიჩის გაწვრთნილი გუნდი ჯერ ჰოლანდიის ძლიერმა ნაკრებმა გაანადგურა (5:1), მეორე შეხვედრაში კი პაოლო როსის ერთადერთმა გოლმა გამოთიშა მუნდიალს.
ავსტრია უკანასკნელ შეხვედრაში დასავლეთ გერმანიის ნაკრებს დაუპირისპირდა, რომელსაც ფინალში გასვლის შანსი ჯერ კიდევ ჰქონდა. ავსტრიელებისთვის მატჩი სატურნირო თვალსაზრისით არაფერს წყვეტდა, მაგრამ ამ ქვეყნის შვილებს არც „ანშლუსი“ ჰქონდათ დავიწყებული, არც მათიას შინდელარის ბურუსით მოცული სიკვდილი და არც 1954 წლის მუნდიალზე ბაზელში განცდილი მწარე მარცხი (1:6) გერმანელებთან.
კორდობის სტადიონზე გაჩაღებულ უშეღავათო ბრძოლაში ანგარიში 2:2 იყო, როდესაც საფინალო სასტვენამდე რამდენიმე წუთით ადრე ჰანს კრანკლმა გამარჯვების გოლი გაიტანა და მოფლიოს მოქმედი ჩემპიონები გაწბილებულები დატოვა. „კორდობას სასწაულის“ სახელით ცნობილ მატჩში შესრულებულმა დუბლმა ჰანს კრანკლი ნამდვილ ვარსკვლავად აქცია.
მუნდიალზე ნაჩვენებმა გმირობამ კრანკლის ბარსელონაში ხმაურიანი ტრანსფერი მოიტანა. კატალონიურ კლუბს იოჰან კრუიფის შემცვლელის პოვნამ იმედი არ გაუცრუა. „ავსტრიელმა იოჰანმა“, როგორც მას კატალონიელი ფანები უწოდებენ, პირველივე სეზონში პიჩიჩის ჯილდო ლა ლიგის 30 მატჩში გატანილი 29 გოლით მოიგო, ხოლო თასების მფლობელთა თასის ფინალში, ბაზელის „ზანკტ იაკობ პარკზე“, დიუსელდორფის ფორტუნასთან დამატებით დროში, თავი მეოთხე და გადამწყვეტი გოლით გამოიჩინა.
ბარსელონაში მწვრთნელთა ცვლამ კრანკლის პროგრესი შეაფერხა და მომდევნო სეზონშივე ვენის ფერსტში იჯარით გადავიდა, რასაც კიდევ ერთი, უკანასკნელი კატალონიური სეზონი მოყვა.
1981 წელს, 28 წლის ასაკში, ჰანს კრანკლი მშობლიურ რაპიდში დაბრუნდა და კიდევ ხუთი სეზონის განმავლობაში 145 ბუნდესლიგურ მატჩში 107 გოლი გაიტანა. მისი მეორედ დაბრუნება ამჯერად გუნდური ტიტულების და მედლების მხრივაც ნაყოფიერი გამოდგა: ავსტრიის ჩემპიონატი ორჯერ მოიგო (1981-82, 1982-83), სამჯერ ზედიზედ ქვეყნის თასს დაეუფლა (1983, 1984, 1985), 1982-83 წლების ბუნდესლიგაში კი კარიერაში მეოთხედ გახდა ავსტრიის პირველობის საუკეთესო ბომბარდირი.
მის შესანიშნავ კარიერას ერთი შავი ლაქაც აქვს, თუმცა ეს უფრო კოლექტიური იყო, ვიდრე - პირადული. 1982 წლის მუნდიალზე თავისი ქვეყნის ყველაზე სამარცხვინო მარცხის მონაწილე ჰანს კრანკლიც იყო: „ხიხონის სირცხვილად“ წოდებულ მატჩში, დასავლეთ გერმანიამ ავსტრიასთან ურთიერთსასარგებლო მინიმალური გამარჯვება მოიპოვა, რამაც სამუდამო ზიანი მიაყენა როგორც ორივე ქვეყნის საფეხბურთო მემკვიდრეობას, ისე - მსოფლიო ფეხბურთს.
როდესაც კრანკლის კარიერა ვინერ სპორტ-კლუბში, კრემსერსა და ზალცბურგის აუსტრიაში (ამჟამინდელი რედ ბულ ზალცბურგი) დასასრულს უახლოვდებოდა, მისი გოლების რაოდენობა არ შემცირებულა. ავსტრიელ ბომბარდირს ყველა იმ გუნდისთვის გაქონდა გოლები, სადაც კი უასპარეზია.
ჰანს კრანკლი 270 გატანილი გოლით დღემდე ავსტრიის ბუნდესლიგის ყველა დროის საუკეთესო მეგოლეა, ხოლო 217 გოლით - ვენის რაპიდის საუკეთესო ბომბარდირი. კარიერის დასრულებისას იგი ავსტრიის ნაკრების საუკეთესო ბომბარდირიც იყო, თუმცა მისი 34-გოლიანი მიღწევა წლების შემდეგ ტონი პოლსტერმა 10 ბურთით გააუმჯობესა.
დიდი ნაკრებები ყოველთვის ამაყობენ ლეგენდად ქცეული ისეთი სახელოვანი ფეხბურთელებით, როგორიც მათიას შინდელარია, თუმცა არც თუ ისე იშვიათად, ჰანს კრანკლის მსგავს გამორჩეულ ვარსკვლავებს ჩვეულებრივი გუნდები მოულოდნელ სიდიადემდე აჰყავთ.
