ბაიერნი ოლისეს გაყიდვაზე უარს ამბობს

მიუნხენის ბაიერნმა მადრიდის რეალს მაიკლ ოლისეს ტრანსფერთან დაკავშირებით მკაცრი და საბოლოო გაფრთხილება გაუგზავნა.

გერმანული გრანდის ხელმძღვანელობა მტკიცედ აცხადებს, რომ ფრანგი შემტევის გაყიდვას არანაირ ფასად არ აპირებს და ესპანური კლუბის ნებისმიერ ოფიციალურ შეთავაზებას მყისიერად უარყოფს.

პერესის გეგმები და ბაიერნის მტკიცე პოზიცია

ჟურნალისტ ფლორიან პლეტენბერგის ინფორმაციით, ჯერ კიდევ უცნობია, გადაიხდის თუ არა რეალის პრეზიდენტი ფლორენტინო პერესი ოლისეს სანაცვლოდ გავრცელებულ 150 მილიონ ევროს. თუმცა, ბაიერნში აღნიშნავენ, რომ მადრიდელებმა პირველი, მეორე და მესამე წინადადებაც რომ გამოაგზავნონ, პასუხი მაინც უარყოფითი იქნება.

კლუბის პრეზიდენტმა, ჰერბერტ ჰაინერმა BILD-თან ინტერვიუში ჭორები კატეგორიულად უარყო:

მაიკლ ოლისე ბაიერნის ფეხბურთელია და მას ხანგრძლივი კონტრაქტი აქვს. ჩვენ არ ვართ ის კლუბი, რომელიც ვარსკვლავებს ყიდის. პერესს შეუძლია ტყუილად არც შეწუხდეს

ულტრამაღალი ფასი და გულშემატკივრების ინტერესი

სატრანსფერო ხმები პერესის ხელახალ არჩევას დაემთხვა, რაც რეალში ტრადიციულად ხმაურიანი ტრანსფერებით აღინიშნება. მიუხედავად ამისა, ბაიერნის საპატიო პრეზიდენტმა, ული ჰიონესმაც დაადასტურა, რომ ფეხბურთელი ხელშეუხებელია.

„ოლისე 200 მილიონ ევროდაც კი არ გაიყიდება. ჩვენ ფეხბურთს ჩვენი მილიონობით გულშემატკივრისთვის ვთამაშობთ. მათ არაფერში გამოადგებათ ბანკში დადებული 200 მილიონი, თუ ამის გამო მოედანზე ცუდ ფეხბურთს ვაჩვენებთ“, - განაცხადა ჰიონესმა.

24 წლის ფრანგმა ვარსკვლავმა გასულ სეზონში ბაიერნში 22 გოლი და 31 საგოლე პასი მიითვალა, ახლა კი სრულად არის კონცენტრირებული საფრანგეთის ნაკრებზე, რომელიც მსოფლიო ჩემპიონატის ჯგუფში სენეგალს, ერაყსა და ნორვეგიას დაუპირისპირდება.