ბარსელონას ამოცანა, გავიდეს ჩემპიონთა ლიგის ნახევარფინალში, კიდევ უფრო გართულდა ატლეტიკო მადრიდთან განცდილი მარცხის (0:2) შემდეგ. ჰანსი ფლიკის გუნდი მეოთხედფინალის პირველ მატჩში, ნოუ კამპზე, ლა ლიგის მეტოქესთან დამარცხდა.
VIDEO: ატლეტიკომ 10-კაციან ბარსას კამპ ნოუზე მოუგო და 1/4 ფინალისკენ დიდი ნაბიჯი გადადგა
ხულიან ალვარესმა ბრწყინვალე საჯარიმო დარტყმით გახსნა ანგარიში, ხოლო ალექსანდრ სერლოტმა სტუმრების უპირატესობა გააორმაგა.
ალვარესის გოლს საფუძვლად ბარსელონას მცველის, პაუ კუბარსის შეცდომა დაედო. მან ჯულიანო სიმეონე წააქცია, როდესაც ატლეტიკოს ვინგერი კარისკენ მიიწევდა. თავდაპირველად მსაჯმა, იშტვან კოვაჩმა, კუბარსის ყვითელი ბარათი აჩვენა, თუმცა VAR-ის ჩარევის შემდეგ, ეპიზოდი მონიტორზე გადაამოწმა და მცველს ბარათი გაუწითლა.
ეს ნიშნავს, რომ ახალგაზრდა მცველი, რომელიც ლა მასიას აკადემიიდან გამოჩენის შემდეგ დაცვის ხაზის შეუცვლელი წევრი გახდა, მომავალ კვირას ესტადიო მეტროპოლიტანოზე გასამართ განმეორებით მატჩს დისკვალიფიკაციის გამო გამოტოვებს.
ეს დიდი დარტყმაა ფლიკისთვის, რომელმაც ამ შეხვედრაში რონალდ არაუხოს ნაცვლად მარტინს ანდო ადგილი სასტარტოში (ურუგვაელი სკამზე დარჩა). გერმანელმა სპეციალისტმა შესვენებაზე სისტემის შეცვლა სცადა - მოედნიდან რობერტ ლევანდოვსკი და კაპიტნის სამკლაურით მოთამაშე პედრი გაიყვანა, მათ ნაცვლად კი გავი და ფერმინ ლოპესი ჩართო თამაშში.
შედეგად, მანჩესტერ სიტის ყოფილი მცველი ერიკ გარსია, რომელმაც მატჩი ნახევარდაცვაში დაიწყო, დაცვის ცენტრში გადავიდა, გავიმ და ფერმინმა შუა ხაზი დაიკავეს, ხოლო მარკუს რაშფორდი შეტევის წინა ხაზზე აიწია.
ბარსელონა არ არის ერთადერთი გუნდი, რომელსაც დანაკლისი ექნება. განმეორებით შეხვედრას ატლეტიკოს ცენტრალური მცველი მარკ პუბილიც გამოტოვებს. მან ტრავმირებული დავიდ ჰანცკო შეცვალა, ყვითელი ბარათი მიიღო და ბარათების ლიმიტის ამოწურვის გამო მომდევნო მატჩში ვერ ითამაშებს.
