ბარსელონას ვარსკვლავის მძიმე მდგომარეობა და ჩაშლილი სეზონი

ბარსელონასა და დანიის ეროვნული ნაკრების მცველის, ანდრეას კრისტენსენის ირგვლივ საგანგაშო ვითარებაა.

დანიის ნაკრების მთავარი მწვრთნელი, ბრაიან რიმერი ბარსელონაში ჩასვლას და ჰანსი ფლიკთან სასწრაფო შეხვედრის გამართვას გეგმავს, რათა ფეხბურთელის ქრონიკული ტრავმების მიზეზები განიხილოს და ერთობლივი სამოქმედო გეგმა შეიმუშავოს.

ესპანური გამოცემა Marca-ს ცნობით, გამუდმებულმა ტრავმებმა კრისტენსენის სათამაშო რიტმი სრულად დაანგრია. მარცხენა ფეხის კუნთის პრობლემის გამო მან მიმდინარე სეზონში უკვე 7 მატჩი გამოტოვა, გასულ სეზონებში კი ფიზიკური პრობლემების (მათ შორის ჯვარედინი იოგების ტრავმის) გამო ათეულობით შეხვედრაში ვერ მიიღო მონაწილეობა. ვითარება იმდენად რთულია, რომ ფეხბურთელს მიმდინარე სანაკრებო პაუზის (პორტუგალიასთან და ნორვეგიასთან მატჩების) გამოტოვებაც მოუწია, რადგან საკუთარი სხეულის მდგომარეობიდან გამომდინარე, საერთაშორისო დონეზე სათამაშოდ თავს მზად არ გრძნობს.

დანიის ნაკრების მწვრთნელმა სიტუაციის სიმძიმეზე ღიად ისაუბრა:

ისე განიცდის ამ სიტუაციას, წუხელ ტელეფონზე კაცის ტირილიც კი გავიგონე. ის ძალიან იმედგაცრუებული და ღრმად დამწუხრებულია

რიმერმა უკვე დაადასტურა, რომ ჰანსი ფლიკთან შეთანხმებულია და უახლოეს პერიოდში ისინი მაგიდის გარშემო დასხდებიან, რათა კრისტენსენის ფიზიკური ფორმის აღსადგენად და პრობლემების აღმოსაფხვრელად საუკეთესო სტრატეგია შეიმუშავონ.