ბელინგემმა ახალი სანაკრებო რეკორდი დაამყარა

ჯუდ ბელინგემი ისტორიაში ყველაზე ახალგაზრდა ევროპელი ფეხბურთელი გახდა, რომელმაც 4 დიდ საერთაშორისო ტურნირზე ითამაშა.

ინგლისის ნაკრების ნახევარმცველმა, რომელმაც ხორვატიასთან მსოფლიო ჩემპიონატის სასტარტო მატჩში (4:2) ძირითად შემადგენლობაში ითამაშა და გოლიც გაიტანა, ახალი ისტორიული რეკორდი დაამყარა.

მატჩის დაწყებით ბელინგემმა გერმანელი ჯამალ მუსიალას რეკორდი გააუმჯობესა.

მუსიალამ რამდენიმე დღით ადრე, კურასაოს წინააღმდეგ გამართულ შეხვედრაში, მსოფლიოს ჩემპიონატისა და ევროპის ჩემპიონატების გათვალისწინებით, 4 ტურნირზე მოთამაშე ყველაზე ახალგაზრდა ფეხბურთელის სტატუსი მოიპოვა.

ბელინგემის დიდი ტურნირების დებიუტი 2021 წელს ჩატარებულ ევროზე შედგა. მოგვიანებით მან 2022 წლის მსოფლიო ჩემპიონატზე ყატარში და ევრო 2024-ზე გერმანიაში ითამაშა. 

ამ სიაში კიდევ ერთი ინგლისელი, მაიკლ ოუენიც ფიგურირებს, რომელმაც მონაწილეობა მიიღო 1998 და 2002 წლების მსოფლიო ჩემპიონატებზე, ასევე ევრო 2000-სა და ევრო 2004-ზე.

ყველაზე ახალგაზრდა ევროპელი ფეხბურთელები, რომლებმაც 4 დიდ ტურნირზე ითამაშეს:

ჯუდ ბელინგემი (ინგლისი) - 22 წელი და 353 დღე

ჯამალ მუსიალა (გერმანია) - 23 წელი და 108 დღე

პედრი (ესპანეთი) - 23 წელი და 202 დღე

ჟერემი დოკუ (ბელგია) - 24 წელი და 19 დღე

მაიკლ ოუენი (ინგლისი) - 24 წელი და 182 დღე

ლუკას პოდოლსკი (გერმანია) - 25 წელი და 9 დღე

მიუხედავად იმისა, რომ ბელინგემი ჯერ მხოლოდ 22 წლისაა, ის უკვე დიდი ტურნირების ერთ-ერთ ყველაზე გამოცდილ ახალგაზრდა ფეხბურთელად ითვლება.

ხორვატიასთან ჩატარებული მატჩი მისთვის ინგლისის ნაკრების მაისურით დიდ საერთაშორისო ტურნირებზე მე-16 შეხვედრა იყო. ამ მაჩვენებლით მან გადაასწრო ისეთ ფეხბურთელებს, როგორებიც არიან ფრენკ ლამპარდი, ტონი ადამსი და ბრაიან რობსონი.

უფრო მეტიც, 23 წლამდე ასაკში ჩატარებული 16 მატჩით ბელინგემი ევროპის ისტორიაში პირველი ფეხბურთელი გახდა.

მან ერთი მატჩით აჯობა თანაგუნდელ ბუკაიო საკას და ასევე გადაასწრო იოშკო გვარდიოლს (14), პედრის (14), კრიშტიანუ რონალდუსა (12) და მაიკლ ოუენს (12).

ინგლისის ნაკრებში ბელინგემს დიდ საერთაშორისო ტურნირებზე 3 გოლი და 2 საგოლე გადაცემა აქვს შესრულებული.