ბერძნულ-რომაული ჭიდაობა: ქართველების წილისყრა და რთული ბარიერები ყაზახეთში

24 ოქტომბრიდან პირველი ნოემბრის ჩათვლით, ასტანა ბერძნულ-რომაულ ჭიდაობაში მსოფლიო პირველობას მასპინძლობს.

ტურნირის დაწყებამდე წილისყრა გაიმართა, რომელმაც ქართველი ფალავნების ბადე და პირველი მეტოქეები გამოავლინა. 

მსუბუქ წონით კატეგორიებში საინტერესო დაპირისპირებები გველის

55 კგ წონით კატეგორიაში ვახტანგ ლოლუა ასპარეზობას მერვედფინალიდან დაიწყებს, სადაც სომეხ ნორაირ ჰახოიანს შეხვდება.

60 კილოგრამში დიმიტრი ხაჩიძეს სომეხ სურენ აღაჯანიანთან რევანშის აღების შანსი ექნება, მათ ევროპის 20-წლამდელთა ფინალში იჭიდავეს, სადაც აღაჯანიანმა 4:0 გაიმარჯვა.

ფრიდონ აბულაძე (63 კგ) მერვედფინალშია და უზბეკ ან ვენესუელელ მეტოქეს ელოდება, დიეგო ჩხიკვაძე (67 კგ) კი იაპონელ კაცუაკი ენდოს დაეჭიდება, რომელიც მიმდინარე წლის თებერვალში ზაგრებში 11:3 ჰყავს დამარცხებული. 

საშუალო და მძიმე წონებშიც საკმაოდ დაძაბული ბრძოლები იგეგმება

იური ლომაძე (72 კგ) და გელა ბოლქვაძე (82 კგ) მერვედფინალებიდან ერთვებიან და წინასწარი ეტაპის გამარჯვებულებს ელოდებიან.

რამაზ ზოიძეს (77 კგ) მედლისკენ გზაზე პირველ ბარიერად შვედი კარლ ედვინ ჰუგო ბაფი ერგო, ხოლო ლაშა გობაძე (87 კგ) მე-16 ნომრად განთესილ აზატ სალიდინოვს დაუპირისპირდება.

რაც შეეხებათ მძიმეწონოსნებს

97 კილოგრამში რობერტ კობლიაშვილის პირველი მოწინააღმდეგე მიხეილ ქაჯაია იქნება, ხოლო ყველაზე მძიმე, 130 კგ კატეგორიაში, სულხან ბუიძე ოქროს მედლისთვის ბრძოლას მინსეოკ კიმთან შეხვედრით დაიწყებს.