ევრობასკეტ 2025-ზე მერვედფინალური ეტაპი უკვე დასრულებულია და რამდენიმე სენსაციაც ვიხილეთ.
ორი დღის განმავლობაში ჩატარებულ რვა მატჩში გამორჩეულმა ვარსკვლავებმა თავიანთი სტატუსის შესაბამისი წარმოდგენები შემოგვთავაზეს.
ტურნირს გამოეთიშნენ ისეთი სუპერვარსკვლავები, როგორებიც არიან ნიკოლა იოკიჩი და კრისტაფს პორზინგისი. სამაგიეროდ, ლუკა დონჩიჩი და იანის ანტეტოკუნმპო ტურნირზე ასპარეზობას აგრძელებენ.
ვინ იყო ყველაზე გამორჩეული შაბათ-კვირის მატჩებში? გამოკითხვას ევრობასკეტის ოფიციალური გვერდი ატარებს.
ლუკა დონჩიჩმა მორიგი ისტორიული მატჩი გამართა ევრობასკეტზე. სლოვენიელმა სუპერვარსკვლავმა ისტორიული სერია გააგრძელა – იტალიასთან 84-77 გამარჯვებაში 42 ქულა, 10 მოხსნა და 3 ჩაჭრა მოაგროვა. ლუკას უკვე პირველივე მეოთხედში 22 ქულა ჰქონდა ანგარიშზე.
კრისტაფს პორზინგისისთვის ტურნირი მწარედ დასრულდა - ლიეტუვამ ბალტიის დერბი 88-79 მოიგო და მასპინძელი ლატვია ტურნირს გამოთიშა. „უნიკორნმა“ კი მოედანზე გული და სული დატოვა: 34 ქულა, 19 მოხსნა და 2 დაფარება, თუმცა ეს ყველაფერი ამაოდ.
იგივე ბედი ეწია ნიკოლა იოკიჩსაც, რომლის ევრობასკეტ 2025-საც ფინეთმა მოულოდნელი 92-86 გამარჯვებით წერტილი დაუსვა. „ჯოკერმა“ სცადა გუნდის გადარჩენა - 33 ქულა, 8 მოხსნა და 3 ჩაჭრა მოაგროვა (ეფექტიანობა 34), თუმცა ფინელთა საოცარ თამაშს სერბეთმა ვერაფერი დაუპირისპირა.
იანის ანტეტოკუნმპომ გრანდიოზული მატჩი ჩაატარა, საბერძნეთმა კი ისრაელთან 84-79 იმარჯვა და რვა საუკეთესო გუნდს შორის გავიდა. ბერძენმა 37 ქულა მიითვალა (21-დან 18 სროლა ზუსტად) და ასევე 10 მოხსნაც დააგროვა.
კიდევ ერთი დიდი სენსაცია ვიხილეთ – საქართველომ ფრანგებს 80-70 აჯობა და მეოთხედფინალის საგზური მოიპოვა. კამარ ბოლდუინი „ჯვაროსნების“ მთავარი მამოძრავებელი ძალა იყო: 24 ქულა, 4 მოხსნა, 2 პასი და 3 ზუსტი სამქულიანი (ეფექტიანობა 30).
ევრობასკეტ 2025-ის მეოთხედფინალური წყვილები გაირკვა
