ბოლო სამ თვეში მეორედ - კეირუშმა აფრიკული ნაკრები დატოვა

კარლოს კეირუშმა ბოლო 3 თვის განმავლობაში უკვე მეორედ დატოვა განის ეროვნული ნაკრების მთავარი მწვრთნელის თანამდებობა.

73 წლის სპეციალისტმა პოსტი თავდაპირველად 5 ივლისს, განის ნაკრების მსოფლიო ჩემპიონატიდან გამოვარდნის შემდეგ დატოვა, თუმცა 9 კვირის შემდეგ, სექტემბრის დასაწყისში, თანამდებობაზე კვლავ დანიშნეს.

24 სექტემბერს კოტ-დ’ივუართან 0:2 მარცხისა და 29 სექტემბერს გამბიასთან 2:4 წაგების შემდეგ, პორტუგალიელმა მწვრთნელმა ეროვნული ნაკრები კიდევ ერთხელ დატოვა.

კარლოს კეირუშის განცხადება:

„ურთიერთპატივისცემის გარემოში გამართული მოლაპარაკებების შემდეგ, განის ფეხბურთის ასოციაცია და მე ორმხრივად შევთანხმდით, რომ შევწყვიტოთ ხელშეკრულება, რომლის საფუძველზეც განის ეროვნული ნაკრების, „შავი ვარსკვლავების“, მთავარი მწვრთნელის თანამდებობას ვიკავებდი.

ეს მარტივი გადაწყვეტილება არ ყოფილა, თუმცა ორივე მხარე შევთანხმდით, რომ არსებული გარემოებების გათვალისწინებით, ჩვენი პროფესიული ურთიერთობის დასრულება ყველაზე მიზანშეწონილი ნაბიჯი იყო.

უპირველეს ყოვლისა, გავითვალისწინეთ განის, „შავი ვარსკვლავებისა“ და მთლიანად განური ფეხბურთის ინტერესები.

ჩემთვის დიდი პატივი იყო განისა და „შავი ვარსკვლავების“ სამსახურში ყოფნა. გულწრფელ მადლობას ვუხდი განის ფეხბურთის ასოციაციას და განსაკუთრებით მის პრეზიდენტს ნდობისთვის და იმ შესაძლებლობისთვის, რომ ასეთი საამაყო საფეხბურთო ქვეყნის ეროვნული ნაკრები მეხელმძღვანელა.

განაში იმ განზრახვით ჩამოვედი, რომ „შავი ვარსკვლავებს“ უფრო ძლიერი მომავლის შექმნაში დავხმარებოდი და ხელი შემეწყო ქვეყანაში არსებული ტალანტების განვითარებისთვის.

მიუხედავად ჩვენი თავდადებისა და ძალისხმევისა, ამისთვის აუცილებელი პირობები სრულად ვერ შეიქმნა, ხოლო ბოლო პერიოდში ნაჩვენებმა შედეგებმაც გავლენა მოახდინა გადაწყვეტილებაზე, რომ ეს გზა აქ დასრულებულიყო.“