მსოფლიო რაგბის ერთა თასის ბოლოსწინა ტურში, საქართველოს ეროვნულმა ნაკრებმა შინ ტონგას უმასპინძლა და ლამაზი, შემტევი თამაშით მეტოქე სრულიად დამსახურებულად დაამარცხა. ამ შედეგით ბორჯღალოსნებმა ტურნირის ჩემპიონობა ნაადრევად გაინაღდეს და მსოფლიო რეიტინგში დამატებით 0.29 ქულა ჩაიწერეს აქტივში.
განსაკუთრებულ აღნიშვნას იმსახურებს ლუკა მატკავას პერფორმანსი. 25 წლის მორაგბე ერთა თასის საუკეთესო მექულეა, მან 5 ტურში ჯამში 76 ქულის დაგროვება მოახერხა და ამდენივე მატჩში მხოლოდ 3 დარტყმა გააცუდა.
მიუხედავად რეიტინგში მცირე წინსვლისა, საქართველო 74.23 ქულით კვლავ მე-13 ადგილზე რჩება, თუმცა უდავოდ პოზიტიური ფაქტია, რომ იტალიასთან (75.84) ქულობრივი სხვაობა შემცირდა. წინ კი ტურნირის დასკვნითი, საშინაო შეხვედრაა აშშ-ს ნაკრებთან, რომელიც ასევე დაუმარცხებლად ასპარეზობს (ორივე გუნდმა 5-5 შეხვედრა მოიგო, 24-24 ქულა დააგროვა და უახლოეს მდევრებს 7-7 ქულით გაუსწრო).
ქართველებს ამერიკელებთან დადებითი ბალანსი აქვთ, 8 მატჩიდან 5 მოგება (ბოლო 4 ზედიზედ) და 3 მარცხი. ამ 8 თამაშიდან 5 საქართველოში ჩატარდა (სამი თბილისში, თითო ბათუმსა და რუსთავში). ბორჯღალოსნებისა და აშშ-ს მომავალი დაპირისპირება შაბათს, 21 ნოემბერს, მიხეილ მესხის სახელობის სტადიონზე 18:00 საათზე დაიწყება.