ლიამ როსენიორი: ჩელსის სეზონი ჩემპიონთა ლიგიდან გამოვარდნით არ დასრულებულა.
ჩელსის მთავარმა მწვრთნელმა, ლიამ როსენიორმა განაცხადა, რომ მისი მოვალეობაა, გუნდმა ჩემპიონთა ლიგიდან გამოვარდნის შემდეგ მოტივაცია არ დაკარგოს. სტემფორდ ბრიჯზე პსჟსთან 0:3 მარცხის შემდეგ, ლონდონელები ტურნირს ორი მატჩის ჯამში, ანგარიშით 8:2 დაემშვიდობნენ.
ეს შედეგი ჩელსისთვის ევროტურნირების ისტორიაში ყველაზე მძიმე ორრაუნდიანი მარცხი აღმოჩნდა. ისევე როგორც პარიზში, პარკ დე პრენსზე, არისტოკრატების წარუმატებლობის მიზეზი ამჯერადაც ინდივიდუალური შეცდომები გახდა.
მატჩის დასაწყისშივე, მე-6 წუთზე, მამადუ სარმა, რომელიც ტრავმირებული რის ჯეიმსისა და მალო გიუსტოს ნაცვლად სასტარტოში გამოჩნდა, უხეში შეცდომა დაუშვა, რითაც ხვიჩა კვარაცხელიამ ისარგებლა და ანგარიში გახსნა. მოგვიანებით ბრედლი ბარკოლამ ბრწყინვალე გოლით უპირატესობა ორამდე გაზარდა, ამ ეპიზოდში ფრანგი შემტევი ტრევო ჩალობას მეთვალყურეობის გარეშე დარჩა. წერტილი კი 19 წლის სენი მაიულუმ დასვა, რომელმაც შეცვლაზე შესვლის შემდეგ მასპინძელთა განადგურება დაასრულა.
VIDEO: კვარას გოლი ლონდონში - პსჟ-მ ჩელსი მეორე მატჩშიც გაანადგურა
მეექვსე წუთი და კიდევ ერთი შეცდომა. ამან ფრთები შეგვაკვეცა. მეორე გოლი კი საერთოდ 25 მეტრიდან ცხრიანში გაიტანეს. როცა მატჩის დასაწყისშივე ორი ბურთით აგებ, ორი მატჩის ჯამში კი სხვაობა უკვე ხუთია, დაბრუნება ძალიან რთულია. რა თქმა უნდა, გვინდოდა უფრო მეტი წინააღმდეგობა გაგვეწია. პსჟს წარმატებას ვულოცავ, მათ შემდეგ ეტაპზე გასვლა დაიმსახურეს.
ეს ჩeლსისთვის ბოლო ერთ კვირაში ზედიზედ მესამე მარცხი იყო, პარიზული ვოიაჟისა და ნიუკასლთან წაგების შემდეგ, როსენიორის იმედისმომცემი სტარტი დასავლეთ ლონდონში კითხვის ნიშნის ქვეშ დადგა. გუნდი პრემიერ ლიგაში მეექვსე ადგილზეა და ჩემპიონთა ლიგის საგზურისთვის ბრძოლა მოუწევს.
ჩემი საქმეა, რომ სეზონი ხელიდან არ გაგვექცეს. ევერტონთან შაბათის მატჩს ორგანიზებულად და ახალი ენერგიით უნდა შევხვდეთ. გვინდა, რომ ამ ტურნირზე მომავალ სეზონშიც ვითამაშოთ. თუ ჩვენს შესაძლებლობებს მაქსიმალურად გამოვავლენთ და შეცდომებს გამოვასწორებთ, მიზანს აუცილებლად მივაღწევთ.
მეორე ტაიმში, როცა მატჩის ბედი უკვე გადაწყვეტილი იყო, როსენიორმა კოულ პალმერი და ჟოაო პედრო შეცვალა, რასაც გულშემატკივრების მხრიდან უკმაყოფილება მოჰყვა, მათ ეს ნაბიჯი თეთრი დროშის აფრიალებად მიიჩნიეს.
თუ მათ სათამაშო დროს არ გავაკონტროლებ, ტრავმის მიღების რისკი ძალიან იზრდება. ხანდახან ისეთი რთული გადაწყვეტილებების მიღება მიწევს, რაც გარედან კარგად არ ჩანს. არავის უხარია საუკეთესო მოთამაშეების შეცვლა, როცა ხუთი ბურთით აგებ, მაგრამ მე გუნდის გრძელვადიან ინტერესებზე უნდა ვიფიქრო.
პარი სენ ჟერმენის მწვრთნელმა, ლუის ენრიკემ კი აღნიშნა, რომ წყვილის ბედი პრაქტიკულად პირველივე შეხვედრაში გადაწყდა: „ვამაყობ ჩემი გუნდით. სიმართლე გითხრათ, ასეთ შედეგს არ ველოდი. პირველ მატჩში 80 წუთის განმავლობაში თანაბარი ბრძოლა იყო, თუმცა ბოლო 10 წუთში მეტოქე გავტეხეთ“.
