ჩელსის კრიზისი გრძელდება: ვინ აგებს პასუხს კატასტროფულ შედეგებზე?

სატრანსფერო ექსპერტმა ფაბრიციო რომანომ მორიგი მარცხის შემდეგ ჩელსის პოზიცია გააჟღერა: აპირებს თუ არა კლუბი ლიამ როსენიორის გათავისუფლებას?

ყველა ტურნირის გათვალისწინებით, როსენიორმა ჩელსის მთავარი მწვრთნელის პოსტზე ბოლო 6 მატჩიდან 5 წააგო. ერთადერთი გამარჯვება გუნდმა ასოციაციის თასზე, ლიგა 1-ის აუტსაიდერ პორტ ვეილთან მოიპოვა.

გუშინდელი დღე სულ სხვა ისტორია იყო. ჩელსი მანჩესტერ სიტის მაღალ კლასს დაუპირისპირდა. მიუხედავად იმისა, რომ ლონდონელებმა პირველი ტაიმი კარგად ჩაატარეს, გუნდებს შორის სხვაობა მაინც თვალშისაცემი იყო. მეორე ტაიმში სურათი შეიცვალა, სიტიმ მეტოქე უბრალოდ გადათელა და ჩელსი საკუთარ მოედანზე 0:3 დამარცხდა.

VIDEO: სიტიმ ჩელსი გაანადგურა და არსენალთან სხვაობა შეამცირა

თუმცა, როგორც ჩანს, როსენიორი პოსტის დატოვებას ჯერ არ აპირებს. რომანოს თქმით, კლუბიდან მისული სიგნალები მოწმობს, რომ ხელმძღვანელობა კიდევ ერთი სამწვრთნელო ცვლილების წინააღმდეგია.

ფაბრიციო რომანო როსენიორის მომავალზე:

ჩელსი კვლავ მხარს უჭერს ლიამ როსენიორს. ასეთია კლუბის გზავნილი დღევანდელი მატჩის შემდეგ. მათ არ ავიწყდებათ, რომ მწვრთნელი იანვარში მოვიდა და წინასასეზონო მომზადება არ გაუვლია. მნიშვნელოვანი იქნება იმის გაგება, თუ როგორ დაასრულებს ჩელსი სეზონს, რადგან ფეხბურთი შედეგებზე დაფუძნებული ინდუსტრიაა, მაგრამ ამ მომენტისთვის პოზიცია ასეთია: ჩვენ გვსურს ვენდოთ ამ მწვრთნელს.

დღეს სხვა სიახლეებიც გავრცელდა. ბევრისთვის უკვე ნათელია, რომ ლიამ როსენიორის კვალიფიკაცია ჩელსის დონეს ვერ ქაჩავს. თუმცა, სიტისთან მარცხის შემდეგ ის რეაგირებას მაინც ცდილობს და აცხადებს, რომ კლუბს ზაფხულის სატრანსფერო ფანჯრისთვის დიდი გეგმები აქვს.

ლონდონელთა თავკაცი გუშინდელ მარცხზე პასუხისმგებლობას საკუთარ თავზე იღებს, რაც მწვრთნელის მხრიდან ლოგიკურია. თუმცა, პასუხისმგებლობა ცალსახად ეკისრება კლუბის მფლობელებსაც, რომლებმაც ისეთი შემადგენლობა შეკრიბეს, რომელიც სასურველ დონესთან ახლოსაც კი არ არის.

ჩელსის მწვრთნელი სიტისთან მარცხის მიზეზებს ასახელებს