ჩემპიონმა იბერიამ სეზონი გამარჯვებით გახსნა

სტარტი აიღო საქართველოს საფეხბურთო ჩემპიონატმა, რომლის პირველ მატჩშიც მოქმედი ჩემპიონი, იბერია 1999 თელავს დაუპირისპირდა.

სტუმარი გუნდისთვის მატჩი ცუდად განვითარდა. მე-20 წუთზე ფირუზ გაბიტაშვილმა პირდაპირ წითელი ბარათი მიიღო და თელავური გუნდი კაცნაკლული დარჩა.

გაბიტაშვილის უხეში თამაშის შემდეგ მძიმე ტრავმა მიიღო გიორგი ქობულაძემ, რომელსაც მოედნის დატოვება მოუწია, მის ნაცვლად კი თამაშში გიორგი ტაბატაძე ჩაერთო.

პირველი ტაიმი უგოლოდ დასრულდა, თუმცა იბერიამ მეორე ტაიმში მაინც მოახერხა გადამწყვეტი უპირატესობის მოპოვება.

47-ე წუთზე სეზონის პირველი გოლი გიზო მამაგეიშვილმა გაიტანა, 75-ე წუთზზე კი შეცვლაზე შემოსულმა ტაბატაძემ გამოიჩინა თავი და მატჩის საბოლოო ანგარიში (2-0) დააფიქსირა.

მოქმედმა ჩემპიონმა ეროვნული ლიგის 2025 წლის სეზონი გამარჯვებით დაიწყო და პირველი 3 ქულა მოიპოვა.

ფოტო: FC Iberia