ჩრდილოეთ ირლანდიის ფეხბურთის ასოციაციამ საქართველოში გასამართი მატჩის შესახებ ოფიციალური განცხადება გაავრცელა.
,,უეფასთან გამართული კონსტრუქციული დიალოგის შემდეგ, ირლანდიის ფეხბურთის ასოციაცია ადასტურებს, რომ ჩრდილოეთ ირლანდიის იმ მხარდამჭერებს, რომლებმაც უკვე დაჯავშნეს მგზავრობა და საცხოვრებელი მანამდე, სანამ გამოცხადდებოდა, რომ უეფას ერთა ლიგის მომავალი მატჩი საქართველოს წინააღმდეგ უმაყურებლოდ ჩატარდებოდა, მატჩზე დასწრების უფლება მიეცემათ.
მხარდამჭერები, რომლებიც შეძლებენ დაადასტურონ, რომ მათი მოგზაურობის გეგმები სტადიონის დახურვის დადასტურებამდე იყო გაკეთებული, მატჩის ბილეთებს მიიღებენ.
ეს ბილეთები გაიცემა იმ პირველი კატეგორიის კვოტიდან, რომელიც უეფას რეგულაციების მიხედვით ირლანდიის ფეხბურთის ასოციაციას ეკუთვნის. ასოციაცია უშუალოდ დაუკავშირდება დაზარალებულ მხარდამჭერებს ბილეთებთან დაკავშირებული აუცილებელი დეტალების დასადასტურებლად.
ირლანდიის ფეხბურთის ასოციაციის აღმასრულებელმა დირექტორმა, პატრიკ ნელსონმა, განაცხადა:
„ვაფასებთ იმ გულშემატკივრების ერთგულებასა და მხარდაჭერას, რომლებმაც უკვე დაგეგმეს მოგზაურობა გუნდის მხარდასაჭერად.
ასევე გვესმის იმ მხარდამჭერების იმედგაცრუება, რომლებიც არსებული შეზღუდვებისა და ამ მატჩის განსაკუთრებული გარემოებების გამო ვერ შეძლებენ დასწრებას. მადლობას ვუხდით მათ მოთმინებისთვის, გაგებისთვის და გუნდისადმი მუდმივი მხარდაჭერისთვის.“
საქართველოსა და ჩრდ. ირლანდიის მატჩი ერთა ლიგის ეგიდით 25 სექტემბერს გაიმართება. მატჩი უეფას სანქციის გამო, რომელიც სომხეთთან მატჩში მომხდარმა ინციდენტმა გამოიწვია, მაყურებლის გარეშე ჩატარდება.
