საქართველოს ეროვნული ნაკრები სულ მალე თავისთვის პირველ ევროპის ჩემპიონატზე იასპარეზებს. ვილი სანიოლის 26-კაციან განაცხადში კი ბევრ მოთამაშეს შევხვდებით, ვისაც კარიერის სხვადასხვა ეტაპზე ქართული ფეხბურთის ფლაგმან დინამო თბილისში უთამაშია.
პირველი ასეთი გიორგი ლორიაა, რომელიც 8 წლის ასაკში ავაზას საფეხბურთო სკოლაში შევიდა, სადაც 17 წლამდე ითამაშა, შემდეგ კი დინამო თბილისის აკადემიაში გადავიდა, საიდანაც 2005 წელს მთავარ გუნდში დაწინაურდა. ლორია დინამოს მეკარე 2005-დან 2014 წლამდე იყო, რა პერიოდშიც საქართველოს ჩემპიონატის გამარჯვებული 3-ჯერ (2007-08, 2012-13, 2013-14), თასის მფლობელი 3-ჯერ (2008-09, 2012-13,2013-14), სუპერ თასის გამარჯვებული კი 2-ჯერ (2006, 2008) გახდა.
2014 წელს გიორგიმ საქართველო დატოვა და საბერძნეთს, კერძოდ კრეტულ ოფის მიაშურა, სადაც მისი მთავარი მწვრთნელი ჯენარო გატუზო იყო, შემდეგ იყო კრილია სოვეტოვი, მახაჩკალის ანჟი, გერმანიის მეორე ბუნდესლიგის მაგდებურგი და კვიპროსული ანორთოსისი, სადაც 4 წელი გაატარა, მისი მწვრთნელი ფამაგუსტურ გუნდში თემურ ქეცბაია გახლდათ. ლორია გუნდთან ერთად 2020-21 წლებში კვიპროსის თასის გამარჯვებული გახდა. 2023 წელს კი ქართველი მეკარე დინამო თბილისში დაბრუნდა, სადაც გუნდთან ერთად საქართველოს სუპერ თასის მოგება მოახერხა.
ლორია საქართველოს ეროვნულ ნაკრებში 2008 წლიდან ასპარეზობს და ჩვენი კარი 77-ჯერ აქვს დაცული. მისი დებიუტი 2008 წლის მაისში ესტონეთის ნაკრებთან შედგა, როცა ის ჯერ კიდევ დინამო თბილისის მეორე მეკარედ ითვლებოდა. დღეს კი ლორია ნაკრებში ჩატარებული მატჩებით მე-6 ადგილზეა.
შემდეგი გურამ კაშიაა, რომელიც დინამო თბილისის წევრი 2003 წლიდან იყო, 2006 წელს კი მთავარ გუნდში დაწინაურდა, მან დედაქალაქურ გუნდში 2010 წლამდე ითამაშა და საქართველოს ჩემპიონი (2007-08), თასისა (2008-09) და სუპერ თასის (2008) მფლობელი გახდა.
შემდეგ კი კაშიამ ნიდერლანდებში გააგრძელა კარიერა, კერძოდ არნემის ვიტესში, სადაც 8 წლის განმავლობაში ასპარეზობდა და კლუბის დამსახურებული ლეგენდაც გახდა. ქართველი მცველი ვიტესის კაპიტანი წლების განმავლობაში იყო და სწორედ მისი კაპიტნობისას მოიგო გუნდმა ისტორიაში პირველი და ჯერ-ჯერობით უკანასკნელი ტიტული. 2016-17 წლების სეზონში არნემელები ნიდერლანდების თასის მფლობელები გახდნენ.
2018-20 წლებში კაშია MLS-ში, კერძოდ სან ხოსეს გუნდში თამაშობდა, 2021 წელს დროებით საქართველოში, თბილისის ლოკომოტივში დაბრუნდა,2021 წლიდან კი ბრატისლავას სლოვანის მოთამაშეა, სადაც მისი მთავარი მწვრთნელი საქართველოს ნაკრების ყოფილი თავკაცი ვლადიმირ ვაისია. ქართველი სლოვაკეთში ჩემპიონატის გამარჯვებული ზედიზედ 3-ჯერ გახდა.
კაშიას დებიუტი საქართველოს ნაკრებში 2009 წლის აპრილში მონტენეგროს წინააღმდეგ შედგა, როცა ის დინამო თბილისის მოთამაშე იყო. დღეს კი გურამი საქართველოს ნაკრების ისტორიაში ყველაზე მეტი მატჩის ჩამტარებელი მოთამაშეა. ცენტრალურმა მცველმა ნაკრების ღირსება უკვე 112-ჯერ დაიცვა. ჯაბა კანკავას ეროვნული გუნდიდან წასვლის შემდეგ კაშია ჯვაროსნების მთავარი კაპიტანია.
გიორგი გველესიანი დინამო თბილისის წევრი 2010-დან 2017 წლამდე იყო, რა დროშიც ეროვნული ლიგის გამარჯვებული 3-ჯერ (2012-13, 2013-14, 2015-16), დავიდ ყიფიანის თასის მფლობელი 4-ჯერ (2012-13,2013-14, 2014-15, 2015-16) და საქართველოს სუპერ თასის გამარჯვებული 2-ჯერ (2014-15, 2015-16) გახდა.
2017 წელს გველესიანმა კარიერა ირანში გააგრძელა, სადაც სხვადასხვა დროს ზობ აჰანის, ნასაჯი მაზანდარანისა და სეპაჰანის ღირსებას იცავდა, 2022 წლიდან კი პერსეპოლისის წევრია, სადაც ირანის ჩემპიონი 2-ჯერ (2022-23, 2023-24) გახდა, თასი (2022-23) და სუპერ თასი (2023) კი თითოჯერ მოიგო. წლევანდელ სეზონში პერსეპოლისმა ჩემპიონობა სწორედ ქართველი მცველის გოლით მოიპოვა.
გიორგი გველესიანის დებიუტი საქართველოს ნაკრების შემადგენლობაში 33 წლის ასაკში, მონტენეგროს ნაკრების წინააღმდეგ შედგა, სადაც ეროვნულმა გუნდმა მეტოქე პოდგორიცაში 1-3 დაამარცხა.
ნიკა კვეკვესკირი დინამო თბილისში 2011 წელს ზუგდიდის ბაიადან გადავიდა. ნახევარმცველმა დედაქალაქურ გუნდში 3 წელი გაატარა, სადაც 2012-13 წლებში უმაღლესი ლიგისა და საქართველოს თასის გამარჯვებული გახდა. 2014 წელს კვეკვესკირმა გორის დილაში გააგრძელა ასპარეზობა, სადაც გუნდთან ერთად საქართველოს ჩემპიონატი (2014-15) მოიგო.
2015 წლიდან ნიკამ კარიერა საზღვარგარეთ გააგრძელა, ჯერ იყო აზერბაიჯანული ინტერი და გაბალა, შემდეგ ყაზახური ტობოლი, 2021 წლიდან კი ქართველი ლეხ პოზნანში თამაშობს,სადაც 2021-22 წლების სეზონში პოლონური ექსტრაკლასას გამარჯვებული გახდა.
ნახევარმცველის დებიუტი საქართველოს ნაკრებში 2015 წლის ოქტომბერში გიბრალტართან მატჩში შედგა, 2024 წლის მარტში კი კვეკვესკირი ისტორიული პენალტის შემსრულებელი გახდა, რომელმაც საქართველო ევროპის ჩემპიონატზე პირველად გაიყვანა.
ოთარ კიტეიშვილი დინამო თბილისის წევრი 2011 წლიდან იყო, 2013 წელს კი მთავარ გუნდში დაწინაურდა და 2018 წლამდე ამ გუნდის ერთ-ერთი ლიდერი იყო. ამ პერიოდში ის უმაღლესი ლიგის, საქართველოს თასისა (2) და სუპერ თასის გამარჯვებული გახდა. 2015 და 2016 წლებში კი საქართველოს საუკეთესო ახალგაზრდა ფეხბურთელად დასახელდა.
2018 წლიდან კიტეიშვილმა კარიერა გრაცის შტურმში გააგრძელა, სადაც დღემდე ასპარეზობს. ის გასულ სეზონში თავის გუნდთან ერთად ავსტრიის ჩემპიონი და თასის მფლობელი გახდა, თავად კი ბუნდესლიგის სეზონის საუკეთესო მოთამაშედ აღიარეს.
გიორგი ქვილითაია დინამო თბილისში 2015 წელს უნგრული გიორიდან გადავიდა და დედაქალაქურ გუნდში 1 სეზონი გაატარა, თუმცა 29 მატჩში 24 გოლის გატანა მოასწრო და იმ სეზონის საუკეთესო ბომბარდირი გახდა, გუნდთან ერთად კი ტრიპლეტის მოგება შეძლო (უმაღლესი ლიგა, საქართველოს თასი და სუპერ თასი).
ქვილითაიამ კარიერა 2016 წელს ვენის რაპიდში გააგრძელა, 2018 წლიდან იყო გენტი, 2020 წლიდან კი კვიპროსული ანორთოსისი და აპოელი. ანორთოსისთან ერთად ქართველმა თავდამსხმელმა კვიპროსის თასი (2020-21) მოიგო, აპოელთან ერთად კი გასულ სეზონში კვიპროსის ჩემპიონი (2023-23) გახდა.
ქვილითაიას დებიუტი ეროვნულ ნაკრებში 2016 წელს შედგა, მას შემდეგ მან 35 მატჩში 6 გოლის გატანა მოახერხა - ლატვიასთან (2), ლიეტუვასთან, კვიპროსთან, სამხრეთ კორეასთან და გიბრალტართან.
ლევან შენგელიამაც დინამო თბილისში ერთი წელი გაატარა, ის 2018 წელს საქართველოში ბელგიური ტუბიცედან ჩამოვიდა და საკმაოდ კარგი წელიც გამოუვიდა, მან 50 მატჩში 25 გოლის გატანა შეძლო და იმ სეზონში დინამოს გამორჩეული ლიდერი იყო. შემდეგ ლევანმა კარიერა თურქულ ქონიასპორში გააგრძელა, შემდეგ იყო ბელგიური ლეუვენი, ახლა კი შენგელია ბერძნულ პანეტოლიკოსში თამაშობს.შენგელიამ საქართველოს ეროვნულ ნაკრებში 2019 წლიდან 13 მატჩი ჩაატარა და 1 გოლიც გაიტანა.
ეს იმ მოთამაშეთა ნაწილია, რომელიც კარიერის სხვადასხვა ეტაპზე დინამო თბილისის ღირსებას იცავდა, ახლა კი საქართველოს ნაკრებთან ერთად ისტორიულ პირველ ევროპის ჩემპიონატზე ითამაშებენ, adjarabetarena მომდევნო ნაწილსაც მალე შემოგთავაზებთ.
