უეფას კონფერენს ლიგის მესამე ტურის მატჩში იბერია 1999 დანიური ფეხბურთის ფლაგმანს, კოპენჰაგენს ესტუმრა და პარკენზე, ოცი ათასი გულშემატკივრის წინ დაძაბულ ბრძოლაში 2:1 დამარცხდა.
გულშემატკივრებისა და ფეხბურთელების დიდ ნაწილს დარჩა შეგრძნება, რომ საკმაოდ თანაბარ თამაშში შეხვედრის მთავარმა არბიტრმა თბილისური გუნდი დაჩგრა - ეს მოსაზრება იბერიას მთავარმა მწვრთნელმა, ლევან კორღალიძემაც გაიზიარა:
მე ვფიქრობ, რომ გოლი იყო ჩასათვლელი
“ძალიან იშვიათად, კი არა და შემიძლია ვთქვა, რომ არ ვაკეთებ ხოლმე მსაჯზე კომენტარს, მაგრამ დღეს პატარა კომენტარს გავაკეთებ…
ისეთი იმედგაცრუებულები ვართ, ასე რომ იშრომებ, ასე რომ იწვალებ, ასეთი მჭიდრო გრაფიკი გვაქვს, გულს და სულს დებ და შემდეგ ერთი არასწორი გადაწყვეტილებით…
ვგულისხმობ უფრო არჩათვლილ გოლს, ჩემი სუბიექტური აზრია და ჩვენ ყველამ, ვინც ვნახეთ, მე ვფიქრობ, რომ გოლი იყო ჩასათვლელი.” -განაცხადა მატჩის შემდომ პრესკონფერენციაზე ლევან კორღალიძემ.
ფაქტია, თამაშის მსვლელობისას მთავარ არბიტრს ვიდეო განმეორების ჯიხურთან ორჯერ უხმეს - ორივე შემთხვევაში ეპიზოდი ქართული გუნდის წინააღმდეგ გადაწყდა. პირველ შემთხვევაში პენალტი დაინიშნა, მეორე შემთხვევაში გამათანაბრებელი გოლი გაუქმდა.
მატჩის 53-ე წუთზე წონასწორობა ჟან მარკ ტიბუემ აღადგინა, თუმცა ფრანგი მცველის გოლი ვიდეო გამეორებაზე გადამოწმების შემდეგ გაუქმდა. მთავარმა არბიტრმა ჩათვალა, რომ კოპენჰაგენელთა მეკარეს ბურთი ხელებში დაფიქსირებული ჰქონდა.
მსაჯობა ძალიან ცუდი იყო
“თუმცა მაგ ორ კონკრეტულ მომენტში, ჩემი აზრით პენალტი იყო, ვიდრე არ იყო და გოლიც უფრო არ იყო ჩასათვლელი ვიდრე იყო.” - განაცხადა მატჩის შემდგომ იბერიას მეკარემ, გიორგი მაკარიძემ.
თუმცა გულშემატკივარს პრეტენზია უფრო სხვა მომენტებზე გვაქვს, სათამაში ეპიზოდები და 50/50-ზე მომენტები, სადაც მთავარი არბიტრი ყოველთვის მასპინძლების მხარეს ირჩევდა.
50/50-ზე, 60/40-ზე ყველა შემთხვევაში იმათკენ დებდა ჯარიმებს
გიორგი მაკარიძე.
კიდევ ერთი საკამათო ეპიზოდი მატჩის ბოლო წუთზე დაფიქსირდა - როდესაც 95-ე წუთზე კოპენჰაგენის კართან კუთხურის მაგივრად, მსაჯმა მეკარეზე ოლივეირა ბრუნეს მხრიდან წესების დარღვევა დააფიქსირა და თბილისელებს უკანასკნელი შანსი წაართვა.
გამეორებაზე გამოჩნდა, რომ მას შემდეგ რაც იაპონელმა მცველმა ბურთი კუთხურზე მოიგერია, წინ გამოსული მეკარე იბერიელთა მეთვრამეტე ნომერს შეეჯახა - მსაჯმა საპირისპირო გადაწყვეტილება მიიღო.
ფაქტია, ბევრმა პატარ-პატარა თუ ერთი-ორმა დიდმა ეპიზოდმა მატჩის შედეგზე გავლენა მოახდინა.
