მაგომედ ზაინუკოვმა აბუ-დაბიში გამართულ UFC-ის ღონისძიებაზე წარმატებული დებიუტის შემდეგ ხაბიბ ნურმაგომედოვს ემოციური პოსტი მიუძღვნა.
მსუბუქი წონის ლეგენდარული ჩემპიონი ახალბედა მებრძოლის კუთხეში არ იმყოფებოდა, რადგან ისლამ მახაჩევისა და უსმან ნურმაგომედოვის საწვრთნელ შეკრებაზე გახლდათ, თუმცა ამას ხელი არ შეუშლია ზაინუკოვისთვის, რომ დამიან ჟეპეცკი მსაჯების გადაწყვეტილებით დამაჯერებლად დაემარცხებინა.
ზაინუკოვისთვის, რომელმაც მუაი-ტაიდან შერეულ საბრძოლო ხელოვნებაში ზუსტად ნურმაგომედოვის მითითებებით ინაცვლა, ხაბიბის როლი კარიერაში უდიდესია. გამარჯვების შემდეგ მან ინსტაგრამზე თავის მენტორს საჯაროდ გადაუხადა მადლობა და მისი წვლილი ხაზგასმით აღნიშნა:
უპირველეს ყოვლისა, მინდა უდიდესი მადლობა გადაგიხადო იმ შრომისთვის, რომელიც ჩემში ჩადე. უფროსო ძმაო, გულწრფელად პატივს გცემ და შენ გვერდით მუშაობით ყოველდღიურად უკეთესი ადამიანი ვხდები. შენი გამოცდილება, მხარდაჭერა და რჩევები ჩემთვის ფასდაუდებელია და იმედია, ყველაფერი სიკეთით დაგიბრუნდება
დაღესტნელი მებრძოლი ნურმაგომედოვის გუნდის მორიგი წარმატებული პროექტია, რომელმაც მსოფლიო ასპარეზზე საკუთარი სიტყვა უკვე თქვა, ყოფილი ჩემპიონი კი ახალი თაობის ვარსკვლავების აღზრდასა და ოქტაგონზე მათ დომინაციას აქტიურად აგრძელებს.
