დავითაშვილი სერია ა-ში? იტალიური კლუბის შეთავაზება სენტ-ეტიენს

სენტ-ეტიენი ბოლო საათებში სატრანსფერო ბაზარზე მნიშვნელოვან ნაბიჯებს დგამს.

რამდენიმე ფეხბურთელის დამატებისა და კიდევ ორი ტრანსფერის ოფიციალურად გამოცხადების მოლოდინის ფონზე, შესაძლოა, კლუბში ფეხბურთელების წასვლის კუთხითაც დაიწყოს აქტიური პროცესები.

ზურიკო დავითაშვილით სერია A-ს კლუბები ინტერესდებიან. ქართველი გარემარბის ამ ზაფხულს გუნდიდან წასვლა უფრო რეალური ჩანს, ვიდრე ოდესმე, მას შემდეგ, რაც ერთი წლის წინ კლუბმა მისი ტრანსფერი დაბლოკა.

ზაფხულის სატრანსფერო საგების ერთ-ერთი მთავარი თემა ლუკას სტასინისა და ზურიკო დავითაშვილის შესაძლო წასვლაა.

ფრანგული Peuple Vert-ის ცნობით, ზურიკო დავითაშვილის ტრანსფერზე ბერგამოს ატალანტამ შეთავაზება გააკეთა. იტალიური კლუბი თავიდანვე სოლიდური წინადადებით გამოვიდა და მოლაპარაკებები, სავარაუდოდ, გაგრძელდება.

როგორც ჩანს, სენტ-ეტიენი ამ საკითხში დათმობაზე წასვლას არ აპირებს, თუმცა საუბარია რვანიშნა თანხაზე, რაც მიანიშნებს, რომ მხარეებმა საბოლოოდ შესაძლოა შეთანხმებას მიაღწიონ.

არსებული ინფორმაციით, იტალიური კლუბი მზადაა ქართველი შემტევის სანაცვლოდ მინიმუმ 10 მილიონი ევრო გადაიხადოს.

შეგახსენებთ, რომ ზურიკო დავითაშვილი საფრანგეთის ლიგა 2-ის გასული სეზონის საუკეთესო ფეხბურთელად დასახელდა.