მადრიდის ატლეტიკოში 16-თვიანი კარიერის შემდეგ, კონორ გალაჰერი ლონდონის ტოტენჰემის ფეხბურთელი ოფიციალურად გახდა.
ინგლისურმა კლუბმა გარიგების სანაცვლოდ 40 მლნ ევრო გადაიხადა, თავად გალაჰერთან კი კონტრაქტი 2031 წლის ზაფხულამდე გააფორმა.
კონორ გალაჰერი ატლეტიკოში ჩელსიდან 2024 წლის აგვისტოში, 42 მლნ ევროდ გადავიდა - ათლეტების მაისური 77 შეხვედრაში მოირგო, აქტივში 7 გოლი და 7 ასისტი ჩაიწერა.
25 წლის ნახევარმცველი ჩელსის აკადემიის აღზრდილია და კარიერაც ლურჯების 23-წლამდელთა გუნდში დაიწყო, რის შემდეგაც ჩარლტონში, სუონსიში, ვესტ ბრომვიჩში, კრისტალ პალასში, ჩელსის მთავარ გუნდსა და ატლეტიკოში ითამაშა.
იანვრის სატრანსფერო ფანჯრისას გალაჰერი ტოტენჰემის პირველი შენაძენია. გარდა ამისა, გუნდმა ვილიარეალში განათხოვრებული მანორ სოლომონი დაიბრუნა და ეგრევე ფიორენტინაში, ასევე იჯარით, გაუშვა.
