„დიდ კლუბში გადასასვლელად მზად ვარ“ - მიქაუტაძე ბარსელონას ინტერესზე

ვილიარეალის 26 წლის თავდამსხმელმა გიორგი მიქაუტაძემ L’Équipe-სთან ინტერვიუში განაცხადა, რომ „დიდ კლუბში გადასასვლელად მზად არის“.

ქართველმა ფეხბურთელმა ზაფხულში ბარსელონას მხრიდან გამოჩენილ ინტერესზეც ისაუბრა და აღიარა, რომ მიმდინარე სეზონი მისთვის რთულად დაიწყო.

გასულ სეზონში მიქაუტაძემ შესანიშნავი შედეგი აჩვენა და ყველა ტურნირზე ჩატარებულ 44 შეხვედრაში 16 გოლი გაიტანა.

ის ლიონიდან ვილიარეალში  გადავიდა. ფრანგული კლუბი იძულებული გახდა, ფეხბურთელი გაეყიდა, რათა საფრანგეთის ფეხბურთის ფინანსური მაკონტროლებელი ორგანოს, DNCG-ის წინაშე აღებული ვალდებულებები შეესრულებინა.

ქართველი თავდამსხმელის კარგმა თამაშმა ბარსელონას ყურადღებაც მიიპყრო, თუმცა კატალონიური კლუბის მთავარი მწვრთნელი ჰანსი ფლიკი ტრანსფერის მომხრე არ ყოფილა.

რა თქმა უნდა, ასეთი ინტერესი სასიამოვნოა და კიდევ უფრო მეტ მოტივაციას მაძლევს. ეს იმასაც ნიშნავს, რომ ჩემს საქმეს კარგად ვასრულებ. გარდა ამისა, ჩავის, ინიესტასა და ბუსკეტსის ეპოქიდან, ასევე MSN-ის (მესი, სუარესი, ნეიმარი) დროიდან მოყოლებული, ბარსელონას გულშემატკივარი ვარ. თუმცა ამ საკითხზე ზედმეტად არ მიფიქრია. მთლიანად წინასასეზონო მომზადებაზე ვიყავი კონცენტრირებული.

მიუხედავად ამისა, მიმდინარე სეზონი მიქაუტაძისთვის შედარებით რთულად მიმდინარეობს. ქართველმა ფეხბურთელმა ყველა ტურნირზე ჩატარებულ 15 მატჩში 5 გოლი გაიტანა, თუმცა ლა ლიგაში მხოლოდ 5-ჯერ მოხვდა სასტარტო შემადგენლობაში.

თავდამსხმელმა აღიარა, რომ არსებული სიტუაცია მისთვის იმედგამაცრუებელია.

მინდა, ყველა მატჩში ვითამაშო, სასტარტო შემადგენლობაში ვიყო და დავამტკიცო, რომ მაღალი დონის თავდამსხმელი ვარ. როდესაც ეს ასე არ ხდება, ან მოედნიდან ნაადრევად გცვლიან, ბუნებრივია, იმედგაცრუებული რჩები.

ქართველმა ფეხბურთელმა ასევე აღიარა, რომ მომავალში უფრო დიდ კლუბში გადასვლაზე ფიქრობს.

დიდ კლუბში თამაში ჩემი ოცნებაა? ფეხბურთის თამაში სწორედ ამ მიზნით დავიწყე. მინდა, კიდევ უფრო მაღალ დონეზე გამოვცადო საკუთარი შესაძლებლობები. 26 წლის ვარ, მაგრამ ვფიქრობ, რომ დიდ კლუბში გადასასვლელად უკვე მზად ვარ. ამისთვის ყველაფერი მაქვს და ყოველ ჯერზე ვცდილობ, ეს დავამტკიცო. შესაძლოა, უბრალოდ ცოტა მეტი დრო მჭირდება.

,,მინდა ვაჩვენო, რისი გაკეთება შემიძლია" - მიქაუტაძე პსჟ-სთან მატჩზე