დიდი დანაკლისი ბაიერნისთვის — ნოიერი დიდი ალბათობით „დერ კლასიკერს“ გამოტოვებს

ბაიერნის კაპიტანი მანუელ ნოიერი მინდორს რამდენიმე კვირით ჩამოშორდა.

თავდაპირველად ვარაუდობდნენ, რომ ფეხბურთელმა წვივის კუნთის მცირე დაზიანება მიიღო და მხოლოდ მომავალ შაბათს, აინტრახტთან მატჩს გამოტოვებდა. თუმცა, სიტუაცია გაცილებით რთული აღმოჩნდა.

ვერდერთან მატჩში მეკარემ მარცხენა წვივის კუნთის ბოჭკოს გაწყვეტა მიიღო. ეს ინფორმაცია კლუბის სამედიცინო შტაბის მიერ ჩატარებული დეტალური გამოკვლევის შემდეგ დადასტურდა.

Bild-ის ცნობით, მდგომარეობა იმაზე მძიმეა, ვიდრე მოსალოდნელი იყო. მიუხედავად იმისა, რომ კლუბის ხელმძღვანელობა თავიდან ნოიერის შეცვლას „პრევენციულ ზომად“ აფასებდა, დიაგნოზი სერიოზული აღმოჩნდა.

39 წლის მეკარე ზუსტად გამოტოვებს აინტრახტთან შეხვედრას, ხოლო მისი მონაწილეობა 28 თებერვალს, დორტმუნდის ბორუსიას წინააღმდეგ გასამართ მატჩში დიდ კითხვის ნიშნის ქვეშ დგას. ნოიერი „დერ კლასიკერში“ მხოლოდ იმ შემთხვევაში ითამაშებს, თუ გამოჯანმრთელების პროცესი წარმოუდგენლად სწრაფად წარიმართება, რაც ამ ეტაპზე ნაკლებად სავარაუდოა.