ენჯ პოსტეკოგლუს ნოტინგემ ფორესტში ძალიან ცუდი სტარტი აქვს.
ევროპა ლიგაზე მიდტიულანდთან (2:3) წაგების შემდეგ, პოსტეკოგლუ კლუბის ისტორიაში პირველი მწვრთნელი გახდა ბოლო 100 წლის განმავლობაში, რომელმაც გუნდის სათავეში თავისი პირველი 6 თამაშიდან ვერცერთი ვერ მოიგო - გუნდმა 2-ჯერ ფრე ითამაშა და 4-ჯერ დამარცხდა.
BBC-ის ინფორმაციით, მიუხედავად ასეთი კატასტროფული სტარტისა, კლუბის ხელმძღვანელობა ბერძენ სპეციალისტს მხარდაჭერას უცხადებს, თუმცა ბუნებრივია, წარუმატებელი მატჩების მიჯრით მიყოლების შემდეგ, მასზე ზეწოლა იზრდება.
მიდტიულანდთან მატჩის მიწურულს, კლუბის გულშემატკივართა გარკვეული ნაწილი პოსტეკოგლუს უმღეროდა, რომ მას დილით სამსახურიდან გაუშვებდნენ.
ამ ეტაპზე ენჯი ხელმძღვანელობისგან მხარდაჭერას იღებს, თუმცა ნიუკასლთან კვირას გასამართმა თამაშმა მის მომავალზე შესაძლოა დიდი გავლენა მოახდინოს. მორიგი წარუმატებლობის შემთხვევაში, სპეციალისტს შესაძლოა თანამდებობა დაკავებიდან სულ რაღაც 27 დღეში დაატოვებინონ.
