პსჟ-ს ბაზაზე გამართული ღია ვარჯიშის შემდეგ, მედიისა და გულშემატკივრების ყურადღების ცენტრში გუნდის ახალგაზრდა შემტევი ნახევარმცველი, დეზირე დუე მოექცა. ფრანგ ტალანტს, რომელიც თავადვე გამოირჩევა ბრწყინვალე დრიბლინგით, პარიზული გუნდის წამყვანი ფეხბურთელების ტექნიკურ თვისებებზე ჰკითხეს. დუემ დიდი პატივისცემითა და აღტაცებით ისაუბრა თავის თანაგუნდელებზე, განსაკუთრებით კი ხვიჩა კვარაცხელიაზე.
ახალგაზრდა ფეხბურთელმა აღნიშნა, რომ ჩემპიონთა ლიგის უმნიშვნელოვანესი ფინალის წინ, რომელიც არსენალის წინააღმდეგ რამდენიმე დღეში გაიმართება, უმაღლესი დონის ვარსკვლავებთან ყოველდღიური მუშაობა მის პროგრესს საგრძნობლად აჩქარებს.
დეზირე დუემ ხაზგასმით აღნიშნა, თუ რამდენად რთულია მცველებისთვის ქართველი ვარსკვლავის წინააღმდეგ თამაში:
კვარაცხელია განსაკუთრებულია იმაში, რასაც აკეთებს. მას აქვს საოცარი უნარი დრიბლინგის, ბურთის დაცვისა და ნებისმიერი მიმართულებით შეტევის. გულახდილად რომ ვთქვათ, მცველებისთვის მის წინააღმდეგ თამაში ნამდვილი კოშმარი უნდა იყოს. ის ჩემზე დიდ შთაბეჭდილებას ახდენს როგორც ვარჯიშებზე, ისე უშუალოდ მატჩების დროს.
ახალგაზრდა ფრანგმა დაამატა, რომ გუნდის ლიდერების გამოცდილება მისთვის საუკეთესო მაგალითია:
სწორედ ასეთი მაღალი დონის და გამოცდილი ფეხბურთელებისგან ვიღებ შთაგონებას ყოველდღიურად. გუნდში არის კვარა, არის უსმანი (დემბელე), არის ბრედლი (ბარკოლა). რა თქმა უნდა, დღეს მათ გვერდით ყოფნა მეც მავითარებს და წინსვლაში მეხმარება. ეს ჩემთვის ძალიან კარგია.
