"ძლიერი მეტოქე მყავს, გულშემატკივარს ვთხოვ, მხარი ტრიბუნებიდან დამიჭირონ" - თოფურია ფინალის წინ

MMA-ის მსოფლიო ჩემპიონატის 79.4 კგ. წონითი კატეგორიის ფინალისტმა, მარიამ თოფურიამ, მოახლოებულ სატიტულო ბრძოლაზე adjarabet arena-სთან ისაუბრა.

"ჩემი ინგლისელი მეტოქე საკმაოდ კარგი და გამოცდილი ჯიუჯიცუს ოსტატია, გასულ წელს კი მსოფლიო ჩემპიონი გახდა. საინტერესო ბრძოლა უნდა გამოვიდეს.

1/2 ფინალში ვფიქრობდი, რომ არ ვიჭიდავებდი, მაგრამ ამის გაკეთება მომიწია. ინგლისელთანაც ვვარაუდობ, რომ არ ვიჭიდავებ, მაგრამ თუ საჭირო გახდება, ყველაფერს გავაკეთებ. ჩემს არსენალში მხოლოდ სტრაიკინგი არაა, თავს ჭიდაობაშიც კარგად ვგრძნობ.

ფინალური ბრძოლა ხუთშაბათსაა ჩანიშნული. გულშემატკივარს მოვუწოდებ, თბილისის ოლიმპიურ სასახლეში მოვიდნენ და მხარი ტრიბუნიდან დამიჭირონ", - განაცხადა თოფურიამ.

შეგახსენებთ, 28 წლის ქართველმა 1/2 ფინალში ბულგარელი სილვია სპასოვა სულ რაღაც 22 წამში დააფინიშა.

ტურნირის ოფიციალური საიტის მიხედვით, მარიამ თოფურიასა და 22 წლის ინგლისელ ალანა პრიჩარდის ჩხუბი 2 ოქტომბერს, 18:48 საათზეა ჩანიშნული.

თოფურიას გარდა, MMA-ის მსოფლიო ჩემპიონატის ოქროს მედლისთვის კიდევ 3 ქართველი იჩხუბებს - გიორგი იმერლიშვილი (+97 კგ.), მირზა გაჯიევი (79.4 კგ.) და ლექსო საბანაძე (იუნიორებში; 97+ კგ.).